Anguhadluq, Luke

(1895–1982)

ᓘᒃ ᐊᖑᕼᐊᓪᓗᐊᖅ ᑎᑎᖅᑐᒐᖅᑎ ᐊᒻᒪᓗ ᑎᑎᕋᐅᔭᓲᖅ ᑕᕆᐅᓐᓄᐊᕐᒥᐅᑕᖅ, ᓄᓇᕗᑦ. ᐃᓅᓯᓕᒫᒥᓂ ᓄᓇᖃᖅᑐᑦ ᓄᓇᑐᐃᓐᓇᒥ ᐅᒃᑯᓯᒃᓴᓕᖕᒥᐅᑦ ᓄᓇᓕᕋᓛᖅ ᑭᓯᐊᓂ ᖃᖓᑎᐊᖑᓂᖅᑐᖅ ᓅᓚᐅᖅᑐᖅ ᖃᒪᓂᑦᑐᐊᕐᒧᑦ, ᓄᓇᕗᑦ. ᐅᑭᐅᖃᓕᕋᒥ 73, ᐊᖑᕼᐊᓪᓗᐊᖅ ᑎᑎᕋᐅᔭᖃᑦᑕᓕᓚᐅᖅᓯᒪᔪᖅ ᑐᑭᖃᖅᖢᑎᒃ ᐊᓯᕙᖅᓯᒪᔪᓂᒃ, ᕿᓚᐅᔾᔭᖅᑐᓂᒃ ᐊᒻᒪᓗ ᓄᓇᓕᖕᓂᒃ. ᑕᐃᑲᓂ 1969, ᑎᑎᖅᑐᒐᕐᓂᖅ ᐱᒋᐊᓚᐅᖅᑐᖅ ᖃᒪᓂᑦᑐᐊᕐᒥ ᐊᒻᒪᓗ ᐊᖑᕼᐊᓪᓗᐊᖅ ᑎᑎᕋᐅᔭᖅᑕᖏᑦ ᕿᒪᒥ ᐋᕿᒃᑕᐅᓪᓗᑎᒃ ᑎᑎᖅᑐᒐᖅᓯᒪᔪᓄᑦ. ᐅᖓᑖᓂ 80 ᐊᖑᕼᐊᓪᓗᐊᖅ ᓴᓇᔭᖏᑦ ᓴᕿᔮᖅᑎᑕᐅᓚᐅᖅᑐᑦ ᖃᒪᓂᑦᑐᐊᕐᒥ ᑎᑎᖅᑐᒐᖅᓯᒪᔪᓂ ᓄᐊᑕᐅᓯᒪᔪᓂ. ᓴᓇᖃᑦᑕᓕᓵᖅᖢᓂ ᓴᓇᔭᖏᑦ 1960-ᒥᑦ 1969-ᒧᑦ ᑖᒃᑯᓇᖓᑦ ᕿᓂᖅᑕᖅ ᑎᑎᕋᐅᑎᑦ, ᐃᒪᓕᑦ ᑎᑎᕋᐅᑎ ᐊᒻᒪᓗ ᑕᖅᓯᖅᓲᑎᑦ ᑎᑎᕋᐅᑎᑦ. ᐃᓄᖕᖑᐊᑦ ᐱᒋᐊᓕᓵᖅᑕᕕᓂᖏᑦ ᑕᐃᑲᓂ ᕿᓂᖅᑕᑐᐃᓐᓇᐃᑦ, ᓴᓇᔾᔪᓯᕐᒥᒍᑦ ᓴᕿᑕᐅᒃᑲᓐᓂᖃᑦᑕᓚᐅᖅᑐᑦ ᑭᖑᓂᐊᒍᑦ ᓲᓗ String Game (ᐊᔭᕈᐊᖅᑐᑦ) (1973). ᑕᐃᑲᖓᑦ 1970-ᒥᑦ 1982-ᒧᑦ, ᐊᖑᕼᐊᓪᓗᐊᖅ ᐱᑖᕈᓐᓇᖅᓯᓚᐅᕋᒥ ᐸᐃᐹᑦᑎᐊᕙᐅᓂᖅᓴᓂᒃ ᑕᐃᒪᓗ ᐊᖏᓂᖅᓴᐅᓕᓚᐅᖅᑕᖏᑦ ᑕᖅᓴᖃᐅᑦᑎᐊᖅᑐᑦ ᑕᖅᓯᖅᓲᑎᓂᑦ ᐊᒻᒪᓗ ᐃᒪᓕᖕᓄᑦ ᑎᑎᕋᐅᑎᓄᑦ ᐊᒻᒪᓗ ᐃᓚᒃᑲᓐᓂᖅᖢᒋᑦ ᑕᖅᓴᖃᐅᕐᓂᖅᓴᐅᓕᖅᖢᒋᑦ ᑖᒃᑯᐊ ᓴᓇᔭᓂ. ᐅᓇᑦᑕᐅᖅ ᐃᓚᕙᓪᓕᐅᑦᓯᐊᓚᐅᖅᑕᖏᑦ ᓇᓗᓇᐃᔭᑦᑎᐊᖅᐸᓪᓕᐊᓪᓗᒋᑦ ᓴᓇᔭᓂ ᓲᕐᓗ ᑲᑭᓐᓂᓕᐅᖅᖢᒍ ᐊᒻᒪᓗ ᑭᓱᖑᐊᖃᖅᑐᓂᒃ ᐊᓐᓄᕌᖑᐊᖃᖅᑎᓪᓗᒋᑦ. ᐊᖑᕼᐊᓪᓗᐊᖅ ᐅᓇ ᐃᓚᓯᖃᑦᑕᓚᐅᖅᑐᖅ ᐊᔾᔨᒌᓐᖏᑦᑐᓂᒃ ᑕᐅᑦᑎᖃᖅᖢᒋᑦ ᓴᓇᔭᒥᓄᑦ, ᐅᖃᓕᒫᕆᐊᖃᕈᓐᓃᖅᑎᑉᐸᓪᓕᐊᓗᒋᑦ ᑕᐃᒪᓗ ᐋᕿᒋᐊᒃᑲᓐᓂᖅᖢᒋᑦ ᑎᑎᑯᑖᒃᓯᒪᔭᓂ ᐊᒻᒪᓗ ᓴᕿᑎᑦᑎᓂᖅᓴᐅᓕᖅᖢᓂ ᐊᖏᓂᖅᓴᓂᒃ ᑲᑎᖓᔪᓂᒃ ᐃᓄᖕᖑᐊᕐᓂᒃ. ᑎᑎᕋᐅᔭᖅᑕᖓ Drum Dance (ᕿᓚᐅᔭᖅᑐᖅ) (1970) ᓴᕿᔮᑦᑎᐊᖅᑐᑦ ᖁᓛᓂᑦ-ᐊᒻᒧᑦ ᖃᓄᐃᓕᐅᖅᑐᑦ ᐊᕙᓗᐊᓂ ᕿᓚᐅᑎ. ᐊᖑᕼᐊᓪᓗᐊᖅ ᑎᑭᐅᑎᑦᑎᐊᖅᓯᒪᕗᖅ ᓴᓇᔫᓂᖓᓂ ᐳᐃᒍᓇᔮᓐᖏᑦᑐᓂᒃ. ᑕᐃᑲᓂ 1976 ᑕᑯᔭᒐᖃᕐᕕᖕᒥ ᐃᓂᖃᖅᑎᑕᐅᓚᐅᖅᑐᑦ ᓄᓕᐊᖓᓗ ᒥᐊᓕᐊᓐ ᑑᕐᓗᒃ ᕕᓂᐲᒃ ᓴᓇᖑᐊᖅᓯᒪᔪᓂᒃ ᑕᑯᔭᒐᖃᕐᕕᖓᓂ ᐊᑎᖃᖅᑐᖅ ᑑᕐᓗᒃ/ᐊᖑᕼᐊᓪᓗᐊᖅ. ᑕᐃᑲᓂ 1993 ᓴᓇᖑᐊᖅᓯᒪᔪᓂᒃ ᑕᑯᔭᒐᖃᕐᕕᖓᓂ ᐋᓐᑎᐅᕆᐅ ᐋᕿᒃᓯᓯᒪᓚᐅᖅᑐᑦ ᐃᓄᑑᓪᓗᓂ ᓴᕿᔮᖅᑎᑕᐅᔪᖅ ᐊᖑᕼᐊᓪᓗᐊᖅ ᓴᓇᔭᖏᑦ ᐊᑎᖃᖅᑐᑦ From the Centre: The Drawings of Luke Anguhadluq (ᑖᒃᑯᓇᖓᑦ: ᑎᑎᕋᐅᔭᖅᑕᖏᑦ ᓘᒃ ᐊᖑᕼᐊᓪᓗᐊᖅ), ᑕᐃᑲᓂ ᐋᑐᕚ ᑲᓇᑕ ᑕᑯᔭᒐᖃᕐᕕᖓᓂ. ᐊᖑᕼᐊᓪᓗᐊᖅ ᓴᕿᔮᖃᑦᑕᖅᓯᒪᔪᖅ ᐊᒥᓱᐃᖅᖢᓂ ᐃᓄᐃᑦ ᓴᓇᖑᐊᖅᑐᓕᕆᔨᒃᑯᑦ ᐅᖃᓕᒫᒐᖏᓐᓂ, ᒫᓇᓵᖅ ᐃᖃᐅᒪᔾᔪᑎᒋᓪᓗᒍ ᑎᑎᕋᖅᑕᖏᑦ ᐃᕐᓂᖓᑕ, ᑑᓂ ᐊᖑᕼᐊᓪᓗᐊᖅ.

ᓴᓇᙳᐊᖅᑎᑦ ᑭᓇᐅᓂᖏᓐᓄᑦ ᑎᑎᕋᖅᓯᒪᔪᑦ ᑐᓂᔭᐅᓯᒪᔪᑦ ᐊᖏᖅᑕᐅᓯᒪᓪᓗᑎᒃ ᐃᓄᐃᑦ ᓴᓇᙳᐊᖅᑎᓕᕆᔨᒃᑯᑦ ᑐᙵᕝᕕᒃ. ᑕᒪᕐᒥᒃ ᐱᔪᓐᓇᐅᑎᑦ ᒪᓕᒐᖅᑎᒍᑦ.

Anguhadluq, Luke

ᐃᕐᒥᔾᔪᑎ

1962

ᐅᔭᕋᒃ

5 x 14 x 12.5 cm

Government of Nunavut Fine Art Collection, On long-term loan to the Winnipeg Art Gallery

NA 1324