![Ashevak, Kenojuak](https://www.inuitartfoundation.org/images/default-source/artist-profile-headshot-photos/kenojuak-ashevak119-jpg.jpg?sfvrsn=e32b1ffd_0)
Ashevak, Kenojuak
Kinngait (Cape Dorset)
(1927–2013)
Ashevak, Kenojuak
(1927–2013)
ᕿᓐᓄᔪᐊᖅ ᐋᓯᕙᒃ, CC, ONu, RCA, ᐃᓅᓂᑯ ᓄᓇᓕᕋᓛᓂ ᐃᑭᕋᓴᒃ, ᓂᒋᐊᓂ ᓯᒡᔭᒥ ᕿᑭᖅᑖᓗᒃ, ᑕᐅᓄᖓᓗ ᓯᓚᕿ ᐊᒻᒪᓗ ᐅᓱᐊᕐᔪᒃ, ᐊᓯᕙᖅᑎ, ᑕᐅᖅᓰᔨ ᐊᒻᒪᓗ ᓈᓚᒃᑕᐅᓯᐊᓲᖅ ᐊᖓᒃᑯᖅ. ᐋᓯᕙᒃ ᐃᓕᑦᑎᓚᐅᖅᑐᖅ ᓴᓇᔾᔪᓯᑐᖃᒥᖕᓂᒃ ᐊᓈᓇᑦᓯᐊᕐᒥᓂᑦ ᑲᐅᕕᓵ ᐊᒻᒪᓗ ᓴᓇᖑᐊᖃᑦᑕᓕᓚᐅᖅᑐᖅ ᐊᒻᒪᓗ ᑎᑎᕋᐅᔭᖅᐸᒃᖢᓂ 20 ᐅᑭᐅᖃᖅᖢᓂ ᐱᖃᑎᒋᓪᓗᒍ ᐅᐃᓂ ᔮᓂᐳ ᐋᓯᕙᒃ (1923-1972), ᐅᑯᐊᒃ ᑲᑐᔾᔨᖃᑦᑕᓚᐅᖅᑐᑦ ᖁᕕᐊᒋᑦᓯᐊᕋᒥᔾᔪᒃ ᓴᓇᖑᐊᕆᐊᒃᓴᖅ. ᑕᐃᒪᓗ ᐋᓐᓂᐊᕕᓕᐊᖅᓯᒪᓪᓗᓂ ᖃᓪᓗᓈᑦ ᓄᓇᖓᓂ ᑲᓇᑕ, ᐋᓯᕙᒃ ᑎᑎᕋᐅᔭᖃᑦᑕᓕᓚᐅᖅᑐᖅ ᐅᓪᓗᑭᓈᖅᓯᖃᑦᑕᕐᓂᐊᕋᒥ. ᐅᑎᕋᒥ ᐅᑭᐅᖅᑕᖅᑐᒧᑦ ᐊᒻᒪᓗ ᓄᓇᑖᖅᖢᑎᒃ ᑭᓐᖓᓄᑦ (ᑭᑉ ᑐᐊᓴᑦ) ᐅᐃᓂᓗ ᐊᒻᒪᓗ ᐃᓚᓂ, ᑕᑯᔭᕆᐅᓚᐅᖅᓯᒪᔭᖓ ᔭᐃᒻᔅ ᕼᐃᐅᔅᑕᓐ, OC, FRSA (1921-2005) ᐊᒻᒪᓗ ᐊᓪᒪ ᕼᐃᐅᔅᑕᓐ, ᐅᑯᐊ ᓴᕿᑦᑎᓯᒪᔪᑦ ᓴᓇᖑᐊᖅᑐᓕᕆᓂᕐᒥᒃ ᐊᒻᒪᓗ ᑲᔪᖏᖅᓴᐃᖃᑦᑕᖅᖢᑎᒃ ᑖᔅᓱᒥᖓ ᑎᑎᕋᐅᔭᖁᓪᓗᒍ ᑖᒃᑯᑎᒍᑦ ᑯᐊᐸᒃᑯᑦ. ᐊᑖᓂ 1960-ᓂ ᐋᓯᕙᒃ ᕿᓚᒥ ᐃᓕᓴᕆᔭᐅᔪᓐᓇᖅᓯᓚᐅᖅᑐᖅ ᑎᑎᖅᑐᒐᖅᑕᒥᓄᑦ ᐊᒻᒪᓗ ᑕᐃᒪᖓᓂᑦ ᖃᐅᔨᒪᔭᐅᑦᑎᐊᖅᑐᖅ ᐃᓄᒃ ᓴᓇᖑᐊᖅᑎᒻᒪᕆᒃ ᓯᓚᕐᔪᐊᓕᒫᒥᑦ. ᐋᓯᕙᒃ ᓴᓇᖑᐊᖃᑦᑕᓚᐅᖅᑐᖅ ᐊᒻᒪᓗ ᑎᑎᖅᑐᒐᖅᖢᓂ ᑭᓯᐊᓂ ᖁᕙᕈᑎᒋᓯᒪᔭᖓ ᖃᐅᔨᒪᔭᐅᑦᑎᐊᓕᕈᑎᒋᓪᓗᒋᑦ ᓴᓇᔭᖏᑦ ᑎᑎᕋᐅᔭᖅᓯᒪᔪᑦ ᐋᕿᒃᑕᐅᓯᒪᓪᓗᑎᒃ. ᓴᓇᖃᑦᑕᖅᑕᖏᑦ ᓂᕐᔪᑎᖑᐊᑦ, ᐃᓄᖑᐊᑦ ᐊᒻᒪᓗ ᑕᕐᓂᖑᐊᑦ ᓯᓚᒥ ᓴᓇᖃᑦᑕᓛᕆᔭᖏᑦ ᐅᒃᐱᖑᐊᑦ ᐱᓗᐊᖅᑐᒥᒃ. The Enchanted Owl (ᓱᓗᖃᐅᖅᑐᖅ ᐅᒃᐱᖕᖑᐊᖅ) (1960), ᓯᕗᓪᓕᖅᐹᖏᓐᓂ ᓴᓇᓯᒪᔭᖓ ᐊᒻᒪᓗ ᖃᐅᔨᒪᔭᐅᔾᔪᑎᒋᓂᖅᐹᖓ ᓴᓇᖃᑦᑕᖅᑕᖏᓐᓂᑦ, ᐅᒃᐱᖑᐊᖅ ᓵᖓᔪᖅ ᕿᒥᕐᕈᐊᖅᑐᒧᑦ. ᐋᕿᒃᓯᒪᓂᖓ ᑖᓐᓇ ᑎᒥᖓ ᑎᑎᖅᑐᒐᓛᒃᓯᒪᔪᖅ ᐊᒻᒪᓗ ᑎᑎᑯᑖᒃᓯᒪᔪᑦ ᕿᓂᖅᑕᖅ ᐊᒻᒪᓗ ᖃᑯᖅᑕᖅ. ᓱᓗᖏᑦ ᐊᕙᒻᒧ ᑎᒥᐊᓂᑦ ᐊᒻᒪᓗ ᑕᒪᕐᒥᒃ ᑐᓄᐊ ᑎᖕᒥᐊᑦ, ᐊᒻᒪᓗ ᑕᑭᓪᓗᑎᒃ ᓱᓗᒐᓛᖏᑦ ᐊᒻᒪᓗ ᐃᕿᓱᓕᖓᓪᓗᑎᒃ ᖁᒻᒧᑦ. ᐋᓯᕙᒃ ᓴᓇᖃᑦᑕᖅᑐᖅ ᓴᖕᖏᔪᐋᓗᖕᓂᒃ ᐊᒻᒪᓗ ᑲᒪᓇᖅᑐᓂᒃ ᐱᐅᓗᐊᒧᑦ ᑎᑎᖅᑐᒐᖅᓯᒪᕐᔪᐊᕋᓂᒋᑦ ᓇᓗᓇᐃᔭᖅᓯᒪᓂᖏᑦ. ᑕᐃᑲᓂ 1970, The Enchanted Owl ᓴᕿᑕᐅᓚᐅᖅᑐᖅ ᑲᓇᑕ ᑎᑎᖃᓄᑦ ᓂᐱᑦᑕᐅᑖᓂ; ᐋᓯᕙᒃ ᓯᕗᓪᓕᖅᐹᖅ ᐃᓄᑉ ᓴᓇᖑᐊᖅᓯᒪᔭᖓᓂᒃ ᓂᐱᐅᑎᒦᑦᑐᖅ ᑎᑎᖃᓄᑦ ᑎᑎᒃᑯᕕᒃᑯᑦ. The Enchanted Owl ᐱᒋᐊᓕᓵᕈᑎᕕᓂᖓ ᐊᒥᓱᐋᓗᖕᓂᒃ ᐊᒻᒪᓗ ᖃᓄᕆᑦᑐᐃᓐᓇᓄᑦ ᓴᓇᓯᒪᓕᖅᑐᖅ. ᐋᓯᕙᒃ ᐃᓚᐅᓯᒪᕗᖅ ᑕᑯᒃᓴᐅᑎᑦᑎᔪᓂ ᑕᒪᐃᓐᓂ ᑲᓇᑕᒥ, ᔫᓚᑉ ᐊᒻᒪᓗ ᐊᐃᓯᐊ, ᐊᒻᒪᓗ ᓴᓇᔭᖏᑦ ᓄᐊᑕᐅᓯᒪᔪᑦ ᓯᓚᕐᔪᐊᒥᑦ ᐱᖁᑎᒋᔭᐅᔪᑦ. ᑲᔪᓯᑦᑎᐊᖅᓯᒪᓂᓂ ᐊᒥᓱᐃᖅᖢᓂ ᐊᒻᒪᓗ ᐃᓚᒋᔭᐅᓪᓗᓂ 1963 ᑲᓇᑕ ᑕᕐᕆᔭᐅᓯᐅᖅᑎᖏᑦ ᓴᕿᔮᖅᑎᑕᖏᑦ Eskimo Artist: Kenojuak (ᐃᔅᑭᒧ ᓴᓇᖑᐊᖅᑎᑦ: ᕿᓐᓄᔪᐊᖅ), ᐅᓇᓗ ᕿᕕᐊᖅᑎᑦᑎᓚᐅᖅᑐᖅ ᐊᒥᓱᓂᒃ ᓴᓇᔭᖏᑦ ᐱᐅᓯᑐᖃᒥᓂᒃ ᐃᓅᓯᕐᒥᒃ ᑲᓇᑕᐅᑉ ᐅᑭᐅᖅᑕᖅᑐᐊᓂ ᐊᒻᒪᓗ, ᐱᓗᐊᖅᑐᒥᒃ, ᐋᓯᕙᒃ ᐊᒻᒪᓗ ᓴᓇᑦᑎᐅᔪᔫᓂᖓᓄᑦ. ᑐᓂᔭᐅᓯᒪᔪᖅ ᑲᓇᑕᒥ ᐃᓕᓴᕆᔭᐅᔾᔪᑎᒥᒃ 1967, ᑕᐃᒪᓗ ᐱᖃᑎᒃᑲᓐᓂᐊᒍᑦ ᑐᓂᔭᐅᓚᐅᖅᑐᖅ ᓱᓕ ᑲᓇᑕᒥ ᐃᓕᓴᕆᔭᐅᔾᔪᑎ 1982-ᒥ ᐊᒻᒪᓗ ᑐᓂᔭᐅᓯᒪᔪᖅ ᒐᕗᓄ ᔭᓄᓗ ᑕᐃᑲᓂ ᓴᓇᖑᐊᖅᑎᑦ 2008-ᒥ. ᐱᑎᑕᐅᓚᐅᖅᑐᖅ ᐃᑲᔪᖅᓯᒪᓂᖓᓄᑦ ᓇᓗᓇᐃᒃᑯᑕᖅᑖᖅᓚᐅᖅᑐᖅ ᐃᓕᓐᓂᐊᕐᕕᒃᔪᐊᖓᓂ ᑐᓛᓐᑐ ᐊᒻᒪᓗ ᑯᐃᓐᔅ ᐃᓕᓐᓂᐊᕐᕕᒃᔪᐊᖓᓂᑦ. ᓱᓕ, ᐃᓚᓕᐅᑎᔭᐅᓚᐅᖅᑐᖅ ᑕᒪᐃᓐᓂ ᐊᕐᕌᒍᑕᒫᑦ ᑭᓐᖓᐃᑦ ᑎᑎᖅᑐᒐᖅᓯᒪᔭᖏᓐᓂᒃ ᓄᐊᑕᐅᔪᓂ ᑕᐃᒪᖓᓂᒃ 1960. ᑕᐃᑲᓂ 2016, ᐋᓯᕙᒃ ᓴᕿᔮᖅᑎᑕᐅᓚᐅᖅᑐᖅ ᑲᓇᑕᒥ ᐃᒻᒪᑲᓪᓚᓂᑦ 1-ᒥᓂᒥᒃ ᑕᓚᕖᓴᒃᑯᑦ, ᐅᑯᐊᓗ ᐃᑲᔫᑎᓚᐅᖅᑐᑦ ᐊᖏᔪᒥᒃ ᐊᒃᑐᐃᓪᓗᓂ ᑕᐃᒪᐃᑎᑦᑎᕙᓚᐅᖅᑐᖅ ᐃᓄᖕᓂᒃ ᓴᓇᖑᐊᖅᑎᓂᑦ ᐊᒻᒪᓗ ᑲᓇᑕᒥ ᓴᓇᖑᐊᖅᑕᐅᓯᒪᔪᓂᒃ. ᐊᒻᒪᓗ ᓴᓇᖑᐊᖅᑎᐅᓂᕐᒥᓄᑦ, ᐋᓯᕙᒃ ᐊᐅᓪᓚᖃᑦᑕᓚᐅᖅᑐᖅ ᐃᖅᑲᓇᐃᔭᖃᑦᑕᖅᖢᓂ ᐱᐅᓯᑐᖃᕐᓄᑦ ᑭᒡᒐᖅᑐᖅᑎᐅᓪᓗᓂ ᐊᒻᒪᓗ ᐊᔪᒋᒥᔭᐅᓪᓗᓂ ᐊᕐᓇᓄᑦ. ᐅᓇ ᖃᐅᔨᒪᔭᐅᑦᑎᐊᓚᐅᖅᑐᖅ ᑐᓐᖓᓇᖅᑐᖅ, ᖃᐅᔨᒪᑦᑎᐊᖅᑐᖅ ᐊᒻᒪᓗ ᑎᔅᓯᓇᖃᑦᑕᓲᖅ, ᑕᐃᒪᓐᓇᐅᒐᒥ ᐃᑲᔫᑎᓚᐅᖅᑐᑦ ᑭᒃᑯᓕᒫᓄᑦ ᖃᐅᔨᒪᔭᐅᑦᑎᐊᖅᖢᓂ. ᐋᓯᕙᒃ ᐅᖃᓪᓚᐅᓯᕆᓚᐅᖅᑕᖓ ᓴᓇᓪᓗᓂ ᑮᓇᐅᔭᓕᐅᕈᑎᒋᖃᑦᑕᕋᒥᐅᒃ ᐃᑲᔫᑎᒃᓴᓂᒃ ᐃᓚᒥᓄᑦ, ᐱᓗᐊᖅᑐᒥᒃ ᓯᕗᓪᓕᖅ ᐅᐃᖓ ᑐᖁᓚᐅᖅᓯᒪᑎᓪᓗᒍ 1972-ᒥ. ᑕᐃᒪᓐᓇᐅᒐᓗᐊᖅᑐᓪᓗᒍ, ᑎᑎᕋᐅᔭᖅᑕᖏᑦ ᐊᒻᒪᓗ ᓴᓇᔭᖏᑦ ᐃᑎᔪᒥᒃ ᐃᓚᓕᐅᑎᓯᒪᔪᑦ ᐊᑐᖅᐸᒃᑕᒥᓂ ᖃᐅᑕᒫᑦ ᐃᓅᓯᕐᒥᓂ, ᐊᒻᒪᓗ ᖁᕕᐊᒋᓪᓗᒍ. ᐃᓅᑐᖃᐅᓕᖅᖢᓂ, ᐊᐱᕆᔭᐅᖃᑦᑕᓚᐅᖅᑐᖅ ᖃᖓ ᓄᖃᓛᕐᒪᖔᑦ ᑎᑎᕋᐅᔭᖅᓂᕐᒧᑦ, ᑭᐅᖃᑦᑕᓚᐅᖅᑐᖅ, “ᐅᓇ ᐃᖅᑲᓇᐃᔮᕋ ᐊᒻᒪᓗ ᖁᕕᐊᒋᓂᖅᐹᕆᔭᕋ. ᖃᓄᖅ ᐱᔭᓇᕐᒪᖔᕐᒪ ᖃᐅᔨᒪᓂᖏᑦᑐᖓ ᐃᓅᓯᕐᒥ ᓴᓇᖑᐊᖃᑦᑕᓐᖏᒃᑯᒪ.”
![Ashevak, Kenojuak](https://www.inuitartfoundation.org/images/default-source/artist-profile-headshot-photos/kenojuak-ashevak119-jpg.jpg?sfvrsn=e32b1ffd_0)
ᓴᓇᙳᐊᖅᑎᑦ ᑭᓇᐅᓂᖏᓐᓄᑦ ᑎᑎᕋᖅᓯᒪᔪᑦ ᑐᓂᔭᐅᓯᒪᔪᑦ ᐊᖏᖅᑕᐅᓯᒪᓪᓗᑎᒃ ᐃᓄᐃᑦ ᓴᓇᙳᐊᖅᑎᓕᕆᔨᒃᑯᑦ ᑐᙵᕝᕕᒃ. ᑕᒪᕐᒥᒃ ᐱᔪᓐᓇᐅᑎᑦ ᒪᓕᒐᖅᑎᒍᑦ.