Eekerkik, Romeo

ᐅᓗᒥᐅ ᐃᑭᑭᖅ (1923-1983) ᓴᓇᖑᐊᖅᑎᐅᓚᐅᖅᑐᖅ/ᐊᖏᔪᓂᒃᓗ ᐅᒃᑯᓯᒃᓴᓕᖕᓂᒃ ᐊᕐᕕᐊᕐᒥᐅᑕᖅ, ᓄᓇᕗᑦ. ᐅᓇ ᑎᒍᐊᖑᓂᑯ ᐊᑖᑕᒃᓴᒥᓄ ᐊᓈᓇᖓ ᐃᓅᔪᓐᓃᕐᒪᑦ, ᐊᒻᒪᓗ ᑭᖑᓂᐊᒍᑦ ᓄᓇᖃᓕᓚᐅᖅᑐᖅ ᓄᑲᕐᒥᓂ ᖃᓂᒋᔭᖓᓂ ᑎᑭᕋᕐᔪᐊᖅ, ᓄᓇᕗᑦ. ᐃᑭᑭᖅ ᖃᐅᔨᒪᔭᐅᓚᐅᖅᑐᖅ ᐊᑐᖃᑦᑕᖅᖢᓂ ᓴᐅᓂᕐᓂᒃ ᐊᒻᒪᓗ ᑐᒃᑐ ᓇᒡᔪᐊ ᐋᕿᑦᑎᐊᖅᓯᒪᔪᑦ ᑭᓱᖑᐊᓕᐊᕆᓯᒪᔭᖏᑦ. ᓴᓇᑐᔫᓚᐅᖅᑐᖅ ᑖᒃᑯᓂᖓ ᓴᓇᓪᓗᒋᑦ ᐊᔾᔨᐅᓐᖏᑑᓪᓗᑎᒃ. ᐃᓄᖑᐊᓂᒃ ᓴᓇᓐᖑᐊᖅᑎᑦ ᐊᒻᒪᓗ ᓴᓇᖑᐊᖅᑎᑦ ᐅᒃᑯᓯᒃᓴᓕᖕᓂᒃ ᐊᕐᕕᐊᓂᑦ ᑭᕙᓪᓕᕐᒥ ᓄᓇᕗᒻᒥ, ᖃᐅᔨᒪᔭᐅᔪᑦ ᐊᑐᓲᑦ ᕿᕐᓂᖅᑕᒻᒪᕆᐋᓗᖕᓂᒃ, ᑎᓯᔪᑦ ᐊᒻᒪᓗ ᐅᒃᑯᓯᒃᓴᓕᖏᒃ ᓴᓇᖑᐊᑦᑕᐅᖃᑦᑕᖅᑐᑦ. ᐃᑭᑭᖅ ᓴᓇᔭᖏᑦ ᐃᓄᖑᐊᑦ ᐊᒻᒪᓗ ᑕᕐᓂᖑᐊᑦ ᓲᕐᓗ ᐊᖓᒃᑯᐃᑦ, ᐊᒻᒪᓗ ᓂᕐᔪᑎᑦ ᐅᑭᐅᖅᑕᖅᑐᑉ ᓯᓚᖓᓂᕐᒥᐅᑕᐃᑦ. ᐆᒃᑑᑎᒋᓪᓗᒍ, Family (ᐃᓚᒌᑦ) (1976) ᒫᓐᓇ ᐃᓂᖃᖅᑐᖅ ᕕᓂᐲᒃ ᓴᓇᖑᐊᖅᓯᒪᔪᓂᒃ ᑕᑯᔭᒐᖃᕐᕕᒃ ᓄᐊᓯᒪᔭᖏᓐᓂ. ᖃᑯᖅᑐᑦ, ᑐᒃᑐᑦ ᓇᒡᔪᖏᑦ ᓴᓇᖑᐊᖅᓯᒪᔭᖏᖅ ᐃᓚᖃᖅᖢᑎᒃ ᐱᖓᓱᓂᒃ ᐃᓄᖑᐊᓂᒃ ᓇᖏᖅᑐᓂᒃ ᓴᓂᓕᕇᑦ. ᐅᑯᐊ ᐊᑐᓂ ᒥᑭᔪᓂᒃ ᑎᒍᒥᐊᖅᑐᑦ, ᓲᕐᓗ ᐃᓅᑉ ᓂᐊᖁᐊᓂᒃ, ᓇᓄᖅ ᐊᒻᒪᓗ ᐃᒡᓯᕙᔪᖅ ᖃᔭᕐᒥ. ᐅᑯᐊ ᐃᓄᖑᐊᑦ ᐊᑐᖅᑐᑦ ᑕᖅᓴᒥᖕᓂ ᑐᓄᒥᖕᓂ, ᓴᐳᓐᓂᐊᕈᑖ ᒪᓕᒃᖢᒋᑦ ᐊᖓᒃᑯᑦ ᑐᑭᓕᐅᕈᑎᖏᓐᓂ. ᐃᑭᑭᖅ ᐅᓇᑦᑕᐅᖅ ᖃᐅᔨᒪᔭᐅᔪᖅ ᓴᓇᖃᑦᑕᓚᐅᖅᑐᖅ ᐃᑲᔪᖅᑎᒋᓪᓗᒍ ᓄᓕᐊᓂ, ᒫᑕ ᐃᕿᐱᕆᐊᖅ ᐃᑭᑭᖅ (1912-1979), ᓴᓇᖑᐊᑦᑎᐊᔪᔪᒻᒪᕆᐋᓗᒃ. ᐅᓇ ᐊᓐᓄᕌᓕᐅᖅᑎ ᓴᓇᖃᑦᑕᖅᑐᖅ ᐊᑭᐊᕐᒥᐅᑕᓂᒃ, ᐊᒻᒪᓗ ᐃᑭᑭᖅ ᐊᑐᖅᐸᓚᐅᖅᑕᖏᑦ ᑐᒃᑐ ᓇᒡᔪᖏᓐᓄᑦ ᑮᓇᖏᓐᓄᑦ ᐊᒻᒪᓗ ᓄᓕᐊᖓᑕ ᐃᓚᓕᐅᑎᓯᒪᕙᒃᖢᒋᑦ ᐊᑭᐊᕐᒥᐅᑕᓕᐊᒥᓄᑦ. ᐃᑭᑭᖅ ᓴᓇᖑᐊᖅᑕᖏᑦ ᐊᒥᓱᓂ ᓴᕿᔮᖅᑎᑕᐅᔪᑦ ᓴᓇᖑᐊᖅᑕᐅᓯᒪᔪᓂ ᓄᐊᑕᐅᓯᒪᔪᓂ, ᓲᕐᓗ ᑲᓇᑕ ᑕᑯᔭᒐᖃᕐᕕᖓᓂ, ᐋᑐᕚᒥ, ᐋᓐᑎᐅᕆᐅ ᐊᒻᒪᓗ ᕕᓂᐲᒃ ᓴᓇᖑᐊᖅᓯᒪᔪᓂ ᑕᑯᔭᒐᖃᕐᕕᒃ ᕕᓂᐲᒃ, ᒫᓂᑑᐸ. ᓴᓇᔭᖏᑦ ᐃᓚᖃᖅᑐᑦ ᑕᑯᒃᓴᐅᑎᑕᐅᔪᑦ ᓲᕐᓗ Uumajut: Animal Imagery in Inuit Art (ᐆᒪᔪᑦ: ᓂᕐᔪᑎᖑᐊᑦ ᐃᓄᐃᑦ ᓴᓇᓯᒪᔭᖏᑦ) (ᒫᑦᓯᒥᑦ ᒪᐃᒧᑦ 1985) ᕕᓂᐲᒃ ᓴᓇᖑᐊᖅᓯᒪᔪᓂ ᑕᑯᔭᒐᖃᕐᕕᒃ ᕕᓂᐲᒃ, ᒫᓂᑑᐸ ᐊᒻᒪᓗ Inuit Master Artists of the 1970s (ᐃᓄᐃᑦ ᒫᔅᑐ ᓴᓇᑐᓛᑦ ᓴᓇᖑᐊᖅᑎᑦ 1970-ᓂ) (ᔮᓄᐊᕆᒥ ᕕᕗᐊᕆᒧᑦ, 1980) ᑕᐃᑲᓂ ᐃᓄᐃᑦ ᑕᑯᔭᒐᖃᕐᕕᖓ ᕚᓐᑰᕙᒥ, ᐳᑎᓯ ᑲᓚᑉᐱᐊ.