ᓄᓕᐊᔪᒃ ᐃᒪᕕᒻᒥ ᐊᓂᕐᓂᐅᒻᒪᑦ ᑕᐃᓐᓇᓗ ᓴᐳᒻᒥᒃᓯᔨᐅᓕᕐᓗᓂ ᐃᓘᓐᓇᓕᒫᖏᓐᓂᒃ ᐃᒪᕕᒻᒥ ᐆᒪᔪᓂᒃ. ᑖᓐᓇᓗ ᐋᖅᑭᖃᑎᒋᔭᐅᒐᓱᒋᐊᖃᓕᕐᓗᓂ ᑭᓇᑐᐃᓐᓇᕐᒧᑦ ᐃᒃᐱᒋᔭᐅᑦᑎᐋᕈᓐᓃᕐᓂᖅᐸᑕ ᐆᒪᔪᖁᑎᖏᑦ. ᖃᓄᐃᓐᓂᕆᔭᖓ ᐃᓕᖅᑯᓯᕆᔭᐅᔪᖅ ᑐᑭᖃᖅᑐᖅ ᑐᑭᓯᐊᓇᑦᑎᐊᖅᑐᑦ ᐅᓂᒃᑳᖅᑐᐊᓄᑦ ᐊᐅᓚᑦᑎᑉᐸᓪᓕᐊᖏᓐᓇᖅᑕᑦᑎᓄᑦ. ᑕᒪᒃᑯᓇᓂ ᖃᐅᔨᒪᔭᐅᓂᖅᐹᖑᔪᖅ ᐊᒥᓱᐋᓗᓐᓂ ᐋᖅᑭᒃᓱᑦᑎᐊᖅᓯᒪᔪᓂ ᐅᖃᐅᓯᒃᑯᑦ ᐅᓂᒃᑳᖅᑐᐊᖑᓲᖅ ᐱᖅᑯᓯᖅᑎᒍ, ᒪᑯᐊᖑᒻᒪᑕ ᐃᒪᕕᒻᒥ ᐊᓂᕐᓂᐅᔪᑦ ᖃᐅᔨᒪᔭᐅᔪᑦ ᐊᔾᔨᒌᖏᑦᑐᓂ ᐊᕕᒃᑐᖅᓯᒪᐅᕐᓂᐅᔪᓂ ᐅᑭᐅᖅᑕᖅᑐᓕᒫᖓᓂ ᑲᓇᑕᐅᑉ ᐅᓇᐅᒻᒪᑦ ᓯᑦᓇ, ᑕᓖᓚᔪᖅ, ᑕᖅᑲᓐᓈᓗᒃ, ᐊᕐᓇᔪᐃᓐᓇᖅ, ᐅᐃᓂᒍᒪᓱᐃᑦᑐᖅ ᐅᕝᕙᓗᓂᑦ ᑖᔅᓱᒪᓂ ᐅᖃᐅᑕᐅᔪᒥ, ᓄᓕᐊᔪᖅ.

2006-ᒥ, ᐊᖏᔪᑦ ᓄᐊᑕᐅᓯᒪᔪᑦ 246 ᓴᓇᔭᐅᓯᒪᔪᑦ ᑐᓂᔭᐅᑐᐃᓐᓇᓚᐅᖅᑐᑦ ᑕᑯᔭᒐᖃᕐᕕᒻᒧᑦ ᕚᓐᑰᕗᒥ ᓄᐊᑦᑎᖃᑦᑕᖅᑐᒧᑦ ᓘᑦᑖᖅ ᕼᐃᐅᕆ ᕗᐃᓐᕌᑉ. ᕗᐃᓂᐸᐃᒡᒥᐅᑕᓪᓚᕆᒃ, ᕗᐃᓐᕌᑉ ᓂᐅᕕᖃᑦᑕᕐᓂᑰᒻᒪᑦ ᐃᓄᐃᑦ ᓴᓇᖑᐊᒐᖏᓐᓂᑦ ᐱᒋᐊᖅᑐᓂ 1968. ᐱᔪᒪᓂᖃᒻᒪᕆᓕᓚᐅᖅᑐᖅ ᓄᐊᑦᑎᓂᕐᒥᑦ ᐃᓄᐃᑦ ᓴᓇᐅᒐᖏᓐᓂᑦ 1971-ᒥᑦ, ᐊᒻᒪ ᐱᓕᕆᓪᓗᐊᑕᖃᓕᖅᑐᓂ ᓂᐅᕕᖃᑦᑕᓂᕐᒥᑦ ᓴᓇᔭᐅᓯᒪᔪᓂᑦ ᐆᒪᔪᒥᓂᕐᒦᖔᖅᑐᓂᑦ ᐊᖑᓇᓱᑦᑕᐅᕙᑦᑐᓂᑦ (ᕿᓚᓗᒐᐃᑦ ᓴᐅᓂᖏᑦ, ᐊᐃᕖᑦ ᑑᒑᖏᑦ, ᐊᒻᒪ ᑐᑦᑐᐃᑦ ᓇᔾᔪᖏᑦ). 54 ᓴᓇᔭᐅᓯᒪᔪᑦ ᕗᐃᓐᕌᑉ ᓄᐊᓯᒪᔭᖏᑦ ᓴᓇᔭᐅᓯᒪᔪᑦ ᐆᒪᔪᒥᓂᕐᒦᖔᖅᑐᑦ, ᐊᒻᒪ 36 ᑖᒃᑯᐊᓂᖓ ᕿᓚᓗᒐᐃᑦ ᓴᐅᓂᖏᑦᓐᓂ. ᕗᐃᓐᕌᑉ ᐋᓐᓂᐊᓯᐅᖅᑎᐅᓚᐅᖅᓯᒪᔪᖅ ᐱᔾᔪᑎᒋᔭᖓ ᐱᔪᒪᓂᖃᕐᓂᖓ ᑖᒃᑯᓂᖓ ᐆᒪᔪᒥᓂᕐᒦᖔᖅᑐᓂᑦ. ᑭᓯᐊᓂᓕ, ᐱᔪᒪᓂᕆᓂᖅᓴᖓ ᐱᐅᔫᑎᓅᓚᐅᖅᑐᖅ. ᐱᔪᒪᓂᖃᓗᐊᓚᐅᖅᑐᖅ ᓴᓇᖑᐊᒐᑦᑎᐊᕙᓐᓂᑦ ᓴᓇᔭᐅᓯᒪᔪᑦ ᓇᑦᑎᓕᖕᒥᐅᑦ (ᓇᑦᓯᓕᒃ) ᓴᓇᖑᐊᖅᑏᑦ ᐅᕙᓐᖓᑦ ᑕᓗᕐᔪᐊᖅ, ᐅᖅᓱᖅᑑᖅ, ᐊᒻᒪ ᑰᒑᕐᔪᒃ. ᓴᓇᔭᐅᓯᒪᔪᑦ ᐊᖓᒃᑯᖃᓂᕐᒥᑦ ᐃᓗᓕᓕᓐᓂᑦ ᐱᔪᒪᓂᖁᓗᐊᓪᖑᐊᓚᐅᖅᑐᖅ, ᐱᓗᐊᖅᑐᒥᑦ ᐆᒪᔪᐃᑦ/ᐃᓄᐃᑦ ᐊᓯᔾᔨᖅᑐᓂᑦ. ᓇᓗᓇᐃᖅᓯᓚᐅᖅᑐᖅ ᐅᓴᐅᓚᐅᖏᑦᑐᖅ “ᐱᑕᖃᒐᔪᑦᑐᑦ” ᑭᓯᐊᓂ ᐊᔾᔨᐅᖏᑦᑐᑦ, ᐊᒻᒪᓘᓐᓃᑦ ᖃᓄᐃᓕᖓᕈᓘᔭᖅᑐᒥᑦ ᓴᖏᔪᒥᑦ ᐱᔪᒪᓂᕆᔭᖓᓄᑦ. ᒫᑦᓯᒥ 2008, ᕼᐃᐅᕆ ᕗᐃᓐᕌᑉ ᓄᐊᓯᒪᔭᖏᑦ ᐅᖃᐅᓯᐅᓚᐅᖅᑐᑦ ᕕᓂᐲᒃ ᓴᓇᙳᐊᒐᐃᑦ ᑕᑯᒐᓐᓈᒐᖃᕐᕕᒻᒥ ᑕᑯᔅᓴᐅᑎᑕᐅᔪᓂᑦ ᐊᒻᒪ ᑎᑎᕋᖅᑕᐅᓯᒪᔪᓂᑦ.