Niviaqsi, Pitseolak

ᐱᑦᓯᐅᓛᒃ ᓂᕕᐊᖅᓯ, RCA ᓴᓇᖑᐊᑎᐅᓪᓗᓂ ᐊᒻᒪᓗ ᑎᑎᖅᑐᒐᖅᑎᐅᓪᓗᓂ ᑭᓐᖓᓂ, ᓄᓇᕗᑦ. ᓂᕕᐊᖅᓯ ᖃᐅᔨᒪᔭᐅᓚᐅᖅᑐᖅ ᐊᔪᒋᑦᑎᐊᕐᓂᖓᓂᒃ ᐃᑎᖅᑎᓯᒪᔪᓂᒃ ᑎᑎᖅᑐᒐᒐᒃᓴᓄᑦ, ᓅᖃᑦᑕᖅᖢᒋᑦ 100-ᖏᓂ ᑎᑎᕋᐅᔭᖅᓯᒪᔪᑦ ᑎᑎᖅᑐᒐᖅᓯᒪᓕᖅᖢᑎᒃ ᑭᓐᖓᐃᑦ ᑎᑎᖅᑐᒐᕐᕕᖓᓂ ᐊᒻᒪᓗ ᐃᓕᓴᕆᔭᐅᓯᒪᔪᖅ ᖃᓂᒋᔮᓂ ᑕᒪᕐᒥᒃ ᑭᓐᖓᐃᑦ ᑎᑎᖅᑐᒐᖅᓯᒪᔪᖏᑦ ᓄᐊᑕᐅᓯᒪᔪᑦ 1975-ᒥᑦ 2011-ᒧᑦ. ᓂᕕᐊᖅᓯ ᓴᓇᖃᑦᑕᓕᓚᐅᖅᓯᒪᔪᖅ ᓂᐅᕐᕈᑎᒋᖃᑦᑕᖅᖢᒋᑦ ᓴᓇᖑᐊᒐᓂ ᑭᓐᖓᐃᑦ ᑎᑎᖅᑐᒐᕐᕕᖓᓄᑦ. ᑲᔪᓯᓚᐅᖅᑐᖅ ᓴᓇᖑᐊᖃᑦᑕᖅᖢᓂ ᐃᓕᓴᐃᖃᑦᑕᓕᖅᖢᓂ ᑎᑎᖅᑐᒐᕐᒥᖕᓂ ᑕᐅᒪᓐᓇ ᓴᓇᖑᐊᓗᐊᓐᖏᓂᖅᓴᐅᓕᖅᖢᓂ ᐊᓂᒍᖅᑎᓪᓗᒍ 1991. ᓂᕕᐊᖅᓯᐅᑉ ᓴᓇᔭᖏᑦ ᓴᖑᖓᐅᖅᑐᑦ ᐊᒻᒪᓗ ᐊᑑᑎᖃᓚᐅᖅᑐᑦ ᐱᑕᖃᓐᖏᑦᑐᓄᑦ ᐃᓂᖃᕐᑎᑦᑎᓪᓗᓂ. ᑎᖕᒥᐊᖑᐊᑦ, ᑐᒃᑐᖑᐊᑦ, ᓄᓕᐊᔪᖑᐊᑦ ᐊᒻᒪᓗ ᐊᓈᓇᖑᐊᑦ ᓄᑕᕋᖃᖅᑐᑦ ᓴᓇᒍᓚᐅᖅᑕᖏᑦ ᓂᕕᐊᖅᓯ. Dancing Sednas (ᒧᒥᖅᑐᑦ ᓄᓕᐊᔪᑦ) (ᐅᓪᓗᖃᓐᖏᑦᑐᖅ) ᑎᑎᕋᐅᔭᖅᑕᖏᑦ ᓂᕕᐊᖅᓯᐅᑉ ᐋᕿᑦᑎᐊᖅᓯᒪᔪᑦ ᓇᓕᖃᕇᑦᑎᐊᖅᑐᑦ ᐊᒻᒪᓗ ᓇᓕᒧᒌᑦᑎᐊᖅᑐᑦ, ᖃᓄᐃᓕᐅᖑᐊᖅᑐᑦ ᒪᕐᕉᒃ ᒧᒥᖅᑐᑦ ᐊᑖᓂ ᐃᒪᐅᑉ. ᓂᕕᐊᖅᓯ ᐊᔪᒋᑦᑎᐊᓚᐅᖅᑐᖅ ᑎᑎᖅᑐᒐᒐᒃᓴᓄᑦ ᖁᕕᐊᒋᓪᓗᒋᑦ ᖃᓄᐃᓕᐅᕆᐊᖃᖅᑐᑦ ᓴᓇᑐᓪᓗᓂ, ᑕᐃᒪᓗ ᓯᕗᓪᓕᖅᐹᖅ ᑎᑎᖅᑐᒐᖅᑐᓕᕆᓂᕐᒧᑦ ᐃᓕᑦᑎᓯᒪᔪᖅ ᐋᕿᒃᓱᐃᔭᕆᐊᒃᓴᖅ ᑕᐃᑲᓂ ᑭᓐᖓᐃᑦ ᑎᑎᖅᑐᒐᕐᕕᖓᓂ. ᓂᕕᐊᖅᓯ ᐱᓕᕆᑦᑎᐊᖅᑐᒻᒪᕆᐋᓘᖃᑦᑕᓚᐅᖅᑐᖅ ᑎᑎᖅᑐᒐᖅᓯᒪᔪᓂᒃ ᐋᕿᒃᓱᐃᓪᓗᓂ ᑕᐃᒪᓗ ᒪᓕᑦᑎᐊᕐᓂᐊᕋᒥ ᑎᑎᖅᑐᒐᖅᓯᒪᔪᑐᖃᓂᒃ ᐊᔪᕐᓇᓐᖏᓂᓕᒫᖓᒍᑦ. ᓂᕕᐊᖅᓯ ᐱᔭᒃᓴᖃᖅᑐᖅ ᓴᕿᑎᑦᑎᒃᑲᓐᓂᖅᖢᓂ ᐊᒥᓱᓂᒃ ᑎᑎᖅᑐᒐᖅᓯᒪᔪᓂ ᑎᑎᖅᑐᒐᕐᕕᖓᓂ ᐃᓚᒋᔭᐅᔪᑦ ᓇᐹᑦᓯ ᐳᑐᒎᑉ ᐊᑎᖃᖅᑐᖅ My New Accordion (ᓄᑖᖅ ᑎᑕᐅᑎᒐ) (1989). ᓂᕕᐊᖅᓯ ᐊᑯᓚᐃᑦᑐᒥᒃ ᐃᓕᓐᓂᐊᖅᑎᑦᑎᕙᓚᐅᖅᑐᖅ ᐊᓯᒥᓂᒃ ᓴᓇᖑᐊᖅᑎᓂᒃ ᖃᓄᖅ ᑎᑎᖅᑐᒐᖅᓯᒪᔪᓕᕆᓂᕐᒧᑦ. ᑕᐃᑲᓂ 1977 ᐅᓗᒃᓴᖅᑑᓕᐊᓚᐅᖅᑐᖅ ᐃᑲᔪᕆᐊᖅᖢᓂ ᓴᕿᑦᑎᓪᓗᑎᒃ ᑎᑎᖅᑐᒐᖅᑐᓕᕆᔾᔪᑎᑦ ᐱᓕᕆᑎᑦᑎᔾᔪᑕᐅᔪᒥᒃ. ᑕᐃᑲᓂ 2000 ᐃᓕᓐᓂᐊᕐᑎᑦᑎᓚᐅᖅᑐᖅ ᓄᓇᕕᒻᒥ ᓴᓇᖑᐊᖅᑎᓂᒃ ᐳᓛᕆᐊᖅᑐᓂᒃ ᑭᓐᖓᐃᑦ ᑎᑎᖅᑐᒐᕐᕕᖓᓂ. ᓂᕕᐊᖅᓯ ᐃᓛᓐᓂᒃᑯᑦ ᓇᖕᒥᓂᖅ ᑎᑎᕋᐅᔭᖅᑕᓂ ᑎᑎᖅᑐᒐᖃᑦᑕᓚᐅᖅᓯᒪᔭᖏᑦ. ᐅᓇ ᖃᐅᔨᒪᔭᐅᑦᑎᐊᖅᑐᖅ ᓴᓇᔭᖏᑦ ᓂᕐᔪᑎᖑᐊᑦ ᑖᒃᑯᐊᓗ Rutting Caribou (ᓄᓕᐊᖅᑐᑦ ᑐᒃᑐᐃᑦ) (2016) ᐊᒻᒪᓗ ᑕᖅᓯᖅᓱᖅᓯᒪᑦᑎᐊᖅᑐᖅ Sheltered Calf (ᐊᐃᕕᐊᓛᖅ ᐊᓈᓇᒥᓃᑦᑐᖅ) (2016). ᖁᕕᐊᒋᔭᖏᑦ ᓴᕿᑎᑦᑕᕆᐊᒃᓴᖅ ᐃᓚᒌᖑᐊᑦ ᓴᓇᖑᐊᖅᑕᒥᓂ ᐃᓚᒋᔭᐅᓪᓗᑎᒃ ᑎᑎᖅᑐᒐᖅᓯᒪᔪ All Aboard (ᑕᒪᐃᓐᓄᑦ) (2016) ᓇᓄᖑᐊᖅ ᐊᓈᓇᖑᐊᖓ ᐊᑎᖅᑕᖃᖅᑐᖅ ᐊᒻᒪᓗ ᓴᓇᖑᐊᖅᑕᖏᑦ Fisherman With Twins (ᐃᖃᓗᒐᓱᖑᐊᖅᑐᑦ ᒪᕐᕈᓕᐊᑦ) (2001), ᓴᕿᓯᒪᔪᖅ ᖄᖓᓂ ᐅᐱᕐᖔᖅ 2002 ᐅᖃᓕᒫᒐᖅ ᐃᓄᐃᑦ ᓴᓇᖕᖑᐊᖅᑐᓕᕆᔨᒃᑯᑦ ᐅᖃᓕᒫᒐᓂ. ᓂᕕᐊᖅᓯ ᓴᓇᔭᖏᑦ ᐃᓂᖃᖅᑐᑦ ᐊᒥᓱᓂᒃ ᐊᔾᔨᒌᓐᖏᑦᑐᑦ ᐊᖏᔪᓂ ᑎᒥᖁᑎᒋᔭᐅᔪᓂ ᐃᓚᒋᔭᐅᓪᓗᑎᒃ ᕕᓂᐲᒃ ᓴᓇᖑᐊᖅᓯᒪᔪᓂ ᑕᑯᔭᒐᖃᕐᕕᒃ ᕕᓂᐲᒃᒥ, ᒫᓂᑑᐸ, ᑲᓇᑕ ᑕᑯᔭᒐᖃᕐᕕᒃ ᐃᑦᑕᕐᓂᑕᓂᒃ ᑳᑦᑎᓄ, ᑯᐸᐃᒃ ᐊᒻᒪᓗ ᑲᓇᑕ ᑕᑯᔭᒐᖃᕐᕕᖓᓂ, ᐋᑐᕚᒥ, ᐋᓐᑎᐅᕆᐅ. ᐃᓕᓴᕆᔭᐅᓯᒪᔪᖅ ᓴᓇᔭᖏᑦ ᓂᕕᐊᖅᓯ ᖃᑭᔾᔪᑎᒃᓴᕆᓪᓗᒍ ᐃᓚᒋᔭᐅᓕᖅᖢᓂ ᐅᓗᔪ ᑲᓇᑕᒥ ᐃᓕᓐᓂᐊᕐᕕᖏᓐᓂᑦ ᓴᓇᖑᐊᖅᑐᓕᕆᓂᕐᒧᑦ.