ᑖᓐᓇ ᑕᐅᑦᑐᖃᑎᓪᓗᐊᓕᖅᓯᒪᓂᖅ ᐊᖏᓂᖅᓵᓗᒻᒪᑦ ᐊᓯᖏᓐᓂᓪᓕ ᑕᓕᕈᓂᓕᒻᒧᑦ. ᓴᓇᖑᐋᖅᓯᒪᑐᐃᓐᓇᕆᐊᖃᕐᒪᑦ ᑕᑯᒃᓴᐅᓂᖓᓂᒃ ᐱᖅᑯᓯᒃᑯᑦ ᑐᑭᓯᓇᖅᓯᔪᑎᒥᒃ ᑭᓯᐊᓂ ᐃᒫᖑᖂᔨᓪᓗᓂ ᑕᓐᓇ ᓴᓇᓯᒪᓂᖓ ᓴᕿᓯᒪᖁᔨᓪᓗᓂ ᓇᒻᒥᓂᖅ ᐃᓅᓯᕆᔭᖓᓂᒃ. ᑕᐃᔅᓱᒪᓂ 19 ᓂᒃ ᐅᑭᐅᖃᒃᑎᓪᓗᒍ ᐊᑖᑕᖓᑕ ᖁᑭᐅᑎᖓ ᖁᑭᕆᐊᓚᐅᖅᓯᒪᒻᒪᑦ ᐱᕐᕈᐊᕿᓪᓗᓂ ᐊᒻᒪᓗ ᖁᑭᖅᑕᐅᓗᓂ ᑕᓕᕈᓂᓕᐅᑉ ᑕᓕᖓ ᓂᕕᖓᑐᐃᓐᓇᓕᕐᓗᓂ ᑐᐃᖓᓂᒃ “ᐱᖓᓱᓄᑦ ᐃᓚᖓᓄᑦ ᐅᕕᓂᖓᑕ”*. ᐊᐱᖅᓱᖅᑕᐅᑎᓪᓗᒍ, ᐃᖃᐅᒪᓚᐅᕐᒪᑦ: “ᑕᑯᒍᓐᓇᓚᐅᕋᒃᑯᑦ ᐃᓱᐊ ᓴᐅᓂᖓ ᑕᓕᕐᒪ ᑭᓯᐊᓂ ᑕᓕᓕᒫᕋ ᐅᖓᓯᒋᔮᓂᓕᓚᐅᕐᒪᑦ ᐅᕙᓐᓂᒃ.” ᑕᓕᕋᓗ ᐊᐅᓚᒍᓐᓇᐃᓕᓪᓗᓂ ᐊᒻᒪᓗ ᐊᓐᓂᐊᖏᓐᓇᓕᕐᓗᓂ ᐃᓅᓯᓕᒫᓐᓂ. ᐊᒃᓱᕉᓴᓐᓂᖓ ᓴᕿᑎᔅᓯᒻᒪᑦ ᐋᕐᓗᖓᔪᓂᒃ ᑮᓇᕐᓂᒃ ᐊᖑᑦ ᐅᓂᐋᖅᑎᓪᓗᒍ ᐅᖁᒪᐃᑦᑐᐋᓗᒻᒥᒃ ᐃᓱᕈᑕᕐᒥᒃ ᑐᙵᕕᖃᓪᓚᕆᒃᑐᔅᓴᐅᒻᒪᑦ ᐃᖃᐅᒪᔭᖓᓂ ᓇᒻᒥᓂᖅ ᐅᒡᒐᖅᓱᓚᐅᕐᓂᕐᒥᓐᓂᒃ.
(ᐊᐱᖅᓱᖅᑕᐅᑎᓪᓗᒍ ᔫᑕᓕᕈᓂᓕ: “ᓂᑲᒍᓱᓐᓂᖅ ᐅᖓᑎᐋᓗᐋᓂᑦᑐᖅ ᑎᑭᑕᐅᒍᓐᓇᕐᓂᖓ ᓴᓇᙳᐊᕐᓂᕐᒧᑦ.” ᐃᐊᑦ. ᒥᐊᕆᕗᐅᓪ ᒪᐃᕈᔅ. ᑐᕌᓐᑐ: ᕼᕐᔨᒡ ᓴᒧᕕᓪ ᑭᒡᓕᓕᓯᒪᔪᖅ, 1977, ᒪᒃᐱᒐᖅ 20)

1971-ᒥ, ᐊᖏᔪᒻᒪᕇᑦ ᔨᐅᕆ ᑐᕘᒥ ᓄᐊᓯᒪᔭᖏᑦ 4,000 ᐃᓄᐃᑦ ᓴᓇᖑᐊᒐᖏᑦ ᓂᐅᕕᖅᑕᐅᓚᐅᖅᑐᑦ ᕕᓂᐲᒃ ᓴᓇᙳᐊᒐᐃᑦ ᑕᑯᒐᓐᓈᒐᖃᕐᕕᒧᑦ. ᑐᕘᒥ ᐊᐅᖏᑎᒎᖅᑐᓂ ᓘᑦᑖᖑᓚᐅᖅᑐᖅ ᐊᒻᒪ ᓇᒥᓯᖃᑕᐅᓯᒪᔪᖅ ᕗᐃᓂᒐᐃᒡ T&T Seeds. ᐱᒋᐊᖅᑐᓂ 1952 ᐊᒻᒪ 1950-ᖏᓐᓂ ᐊᒻᒪ 1960-ᖏᓐᓂ, ᓄᐊᑦᑎᓚᐅᖅᑐᖅ ᓴᓇᔭᐅᓯᒪᔪᑦ ᓴᓇᖑᐊᒐᓕᐅᖅᑐᓕᒫᓂᑦ ᐃᓄᐃᑦ ᓄᓇᖏᓐᓂ. ᐱᐅᒋᔭᖃᒻᒪᕆᓚᐅᖅᑐᖅ ᑐᓂᐅᖅᑲᖅᑕᐅᓂᖏᓐᓄᑦ ᓴᓇᖑᐊᕈᓐᓇᑎᐊᖅᑐᓂᑦ ᐃᓚᒌᓐᓂᑦ ᐊᒻᒪ ᑭᖑᕚᕇᖃᑦᑕᐅᑎᔪᓂᑦ ᐊᒻᒪ ᓄᐊᑦᑎᓚᐅᖅᑐᖅ ᐃᒻᒥᑰᖅᑐᓂᑦ ᓴᓇᖑᐊᖅᑎᓂᑦ.
1969-ᒥ, ᑐᕘᒥ ᓄᖅᑲᕕᓚᐅᖅᑐᖅ ᐱᕈᕈᓐᓇᖅᑐᓂᑦ ᐱᓕᕆᓂᕐᒥᑦ ᐊᒻᒪ ᓅᑦᑐᓂ ᑲᓕᐴᓐᔨᐊᒧᑦ ᐱᕈᖅᓯᐊᓕᐅᖃᑦᑕᖅᑐᓂ. ᐃᓕᔭᐅᓂᖏᑦ ᓄᐊᓯᒪᔭᖏᑦ ᐋᔩᖃᑎᒌᔾᔪᑕᐅᒻᒪᕆᓚᐅᖅᑐᑦ ᐊᒥᓱᒐᒪᓐᓄᑦ ᑕᑯᔭᒐᖃᕐᕕᓐᓄᑦ ᐊᒻᒪ ᓄᐊᑦᑎᖃᑦᑕᖅᑐᓄᑦ. ᔪᐊᔾ ᓱᕕᓐᑕᓐ ᐊᔭᐅᕆᐊᓚᐅᖅᑕᖓ ᐳᕇᒥᐅᖑᓚᐅᖅᑐᖅ ᐃᐊᑦᕗᑦ ᓱᕋᐃᔪ ᓄᐊᑕᐅᓯᒪᔪᓂᑦ ᐱᒻᒪᕆᐅᓂᖓᓄᑦ ᐊᒻᒪ ᐋᒡᒌᓯ 1971 ᓱᕋᐃᔪ ᐊᑎᓕᐅᑦᑕᐅᑎᒋᓚᐅᖅᑕᖓ ᑲᑎᒪᔨᓄᑦ ᑮᓇᐅᓂ ᐱᕈᖅᑎᑦᑎᓗᓂ $185,000, ᐅᕝᕙᓘᓐᓃᑦ ᒪᕐᕉᒃ−ᐱᖓᓱᓂᑦ ᑮᓇᐅᔭᐃᑦ ᐱᑕᖃᕆᐊᖃᖅᑎᑕᐅᔪᑦ ᓂᐅᕕᕐᓗᒋᑦ ᓄᐊᑕᐅᓯᒪᔪᑦ ᕕᓂᐲᒃ ᓴᓇᙳᐊᒐᐃᑦ ᑕᑯᒐᓐᓈᒐᖃᕐᕕᒻᒧᑦ. ᔫᓂ 1972-ᒥ, ᔭᐃᒻᔅ ᕆᑦᓱᑦᓐ, ᑕᐃᔅᓱᒪᓂ ᒐᕙᒪᑐᖃᒃᑯᓐᓄᑦ ᒥᓂᔅᑕ ᓱᓇᒃᑯᑖᖃᖅᑎᑦᑎᓂᕐᒧᑦ ᐊᒻᒪ ᐱᔨᑦᑎᖅᑕᓄᑦ, ᑐᓂᓯᓚᐅᖅᑐᖅ ᓯᒃᑭᒥᑦ ᐊᒥᐊᒃᑯᖓᓂ $75,000 ᑯᕕᐊᓱᒍᑎᖃᖅᑎᓪᓗᒋᑦ ᑕᑯᔭᒐᖃᕐᕕᒻᒥ. ᖁᕕᐊᓱᒍᑎᒋᓗᒋ ᑕᒪᒃᑭ ᒪᑐᐃᖅᑕᐅᓂᖓ ᓄᑖᖅ ᑕᑯᔭᒐᖃᕐᕕᒃ ᐃᓪᓗᖅ ᒥᐊᒨᕆᐅ ᐳᓕᕗᐊᑦ ᐊᒻᒪ ᓂᐅᕕᖅᑕᐅᓂᖏᑦ ᑐᕘᒥ ᓄᐊᓯᒪᔭᖏᑦ, ᒥᑭᔪᒥᑦ ᑕᑯᕋᓐᓈᖅᑕᐅᓂᐊᖅᑐᓂᑦ ᐋᖅᑭᑦᑕᐅᓚᐅᖅᑐᖅ 1972-ᒥ. 2003-ᒥ, ᐊᑕᖐᓂᖃᖅᑐᒥᑦ ᕕᓂᐲᒃ ᓴᓇᙳᐊᒐᐃᑦ ᑕᑯᒐᓐᓈᒐᖃᕐᕕᒃ ᑕᑯᔅᓴᐅᑎᑦᑎᓂᖓ ᐊᒻᒪ ᑎᑎᕋᖅᑕᐅᓂᖏᑦ ᓴᖅᑭᑎᑦᑎᓚᐅᖅᑐᑦ ᐊᔾᔨᒌᓐᖑᐊᖅᑎᒐᔅᓴᐅᖏᑦᑐᑦ ᐱᕙᓪᓕᐊᑎᑕᐅᓂᖏᑦ ᐃᓄᐃᑦ ᓴᓇᐅᒐᖏᑦ 1950-ᖏᓐᓂ ᐊᒻᒪ 1960-ᖏᓐᓂ ᐱᑕᖃᖅᑎᑕᐅᔪᑦ ᑐᕘᒥ ᓄᐊᓯᒪᔭᖏᓐᓂ.