ᔮᓐ ᖃᕝᕕᒃ ᐅᑭᐅᖃᓕᕇᓚᐅᖅᑐᖅ 60−ᖏᓃᑦᑐᓂᒃ ᓴᓇᖑᐊᖃᑕᓯᒋᐊᕋᒥ 1960−ᖑᑎᓪᓗᒍ. ᑕᐃᒪᐃᓕᖓᑎᑦᑎᔪᒪᓂᕐᒥᓗᓐᓃᑦ, ᐃᓐᓇᕈᖅᐸᓕᐊᓕᕐᓂᕐᒥᓄᓪᓗᓐᓃᑦ, ᖃᕝᕕᐅᑉ ᓴᓇᓯᒪᔭᖏᑦ ᖃᐅᔨᒪᔭᐅᑦᑎᐊᓕᓚᐅᖅᑐᑦ ᓱᓇᑐᖃᓗᐊᖃᑕᖏᓂᖏᓐᓄᑦ, ᓴᓇᓯᒪᓗᐊᖅᑕᐃᓕᒫᔪᔮᖅᑐᓂᒃ. ᑕᐃᓐᓇ ᓴᓇᔭᕌᖓᒥᒃ ᐅᒃᑯᓯᒃᓴᔭᕐᒥᒃ ᐊᒋᐊᖅᐸᓚᐅᕐᒪᑦ, ᐃᑰᑕᖅᓱᓂ, ᐲᔭᐃᓪᓗᓂᓗ, ᐊᒻᒪᓗ ᐃᓗᓕᖅᑐᐃᕙᒃᓱᓂ ᐃᓄᖑᐊᓕᐊᕆᔭᒥᓂᒃ, ᐱᐅᔫᓂᖏᓐᓂᒃ ᐃᓱᒪᔪᔮᕌᓂ; ᓴᓇᕐᕈᑎᓄᑦ ᐊᒃᑐᖅᑕᐅᓯᒪᓂᖏᑦ ᑕᑯᒃᓴᐅᑦᓯᐊᖅᐸᒃᑐᑦ. ᓴᓇᓯᒪᓂᖏᑦ ᖃᕝᕕᐅᑉ ᐱᐅᓯᕆᓯᒪᔭᖓ ᐃᒃᐱᓐᓇᖅᑐᖅ ᓴᖏᓂᖃᕐᓂᖓᓄᑦ ᐊᒻᒪᓗ ᐃᓗᒃᑯᑦ ᐃᒃᐱᓂᐊᓇᕐᓂᕐᒧᑦ. ᐊᕐᓇᖑᐊᑦ ᓲᕐᓗ ᑖᑦᓱᑐᓇ, ᐃᓄᖑᐊᓗᒍ ᐃᓄᑐᐊᑦ ᐃᒥᒍᑦ ᐊᒻᒪᓗ ᐅᒥᖕᒪᖑᐊᑦ ᖃᕝᕕᐅᑉ ᓴᓇᒐᔪᖕᓂᖅᐹᕆᕙᓚᐅᖅᑕᖏᑦ.

ᔪᐊᔾ ᓱᕕᓐᑕᓐ ᓅᓚᐅᖅᓯᒪᔪᖅ ᕗᐃᓂᐸᐃᒡᒧᑦ 1954 ᐃᓕᓐᓂᐊᑎᑦᑎᔨᐅᖃᑕᐅᓪᓗᓂ ᐃᓕᓐᓂᐊᕐᕕᒃ ᓴᓇᔭᐅᓯᒪᔪᓂᑦ ᓯᓚᑦᑐᖅᓴᕐᕕᒃᔪᐊᒥᑦ ᒫᓂᑑᐸ. ᑲᓇᑕᒨᓚᐅᖅᓯᒪᔪᖅ ᕕᐊᓇᒥ 1937-ᒥᑦ; ᐃᓕᓐᓂᐊᓚᐅᖅᑐᖅ ᓴᓇᔭᐅᓯᒪᔪᓂᑦ ᐃᓕᓐᓂᐊᖅᑏᑦ ᑎᒥᖓᑦ ᓂᐅ ᔪᐊᒃᒥ; ᓴᓇᖑᐊᖅᑎᐅᓚᐅᖅᑐᖅ ᑯᐃᓐ ᓯᓚᑦᑐᖅᓴᕐᕕᒃᔪᐊᖓ ᑭᖕᔅᑕᓐᒥ, ᐋᓐᑎᐅᕆᔪ; ᐊᒻᒪ ᑲᒪᔨᐅᓚᐅᖅᑐᖅ ᑲᓇᑕᒥ ᑕᑯᔭᒐᖃᕐᕕᒃ ᑲᓇᑕ ᐊᒻᒪ ᓴᔅᓯᖃᑑᓐ ᓴᓇᔭᐅᓯᒪᔪᓂᑦ ᐱᓕᕆᑯᒃ. ᓯᕗᓪᓕᖅᐹᒥᑦ ᓂᐅᕕᓚᐅᖅᓯᒪᔭᖓ ᐃᓄᐃᑦ ᓴᓇᖑᐊᒐᖅ ᒫᓐᑐᕆᐊᒥ 1950-ᒥ, ᐊᒻᒪ ᑕᒪᑐᒥᖓ ᐱᔪᒪᓂᕆᔭᖓ ᐃᑲᔪᖃᑦᑕᓕᓚᐅᖅᑐᖅ ᓂᐅᕕᕐᕕᒃᑯᓐᓂᑦ ᖃᐅᔨᓴᖅᑐᓂ ᓴᓇᖑᐊᒐᕐᓂᑦ ᑎᑭᓯᒪᓕᕋᐃᒻᒪᑕ ᕗᐃᓂᐸᐃᒡᒧᑦ ᐴᖅᑕᐅᓯᒪᔪᓂᑦ ᓂᐅᕕᕐᕕᒃᑯᑦ ᐅᑭᐅᑕᖅᑐᒥ ᓂᐅᕕᕐᕕᖏᓐᓂ. ᐱᔪᒪᓂᖃᕐᓂᖓ ᐃᓄᐃᑦ ᓴᓇᐅᒐᖏᓐᓂ ᐊᔭᐅᖅᑕᐅᒋᐊᓚᐅᖅᑐᖅ ᓯᕗᓪᓕᖅᐹᒥ ᐅᑭᐅᑕᖅᑐᒨᖅᑐᓂ, ᐃᓄᒃᔪᐊᖅ, 1957-ᒥᑦ. ᑎᑎᕋᒪᐅᖅᑐᖅ ᒪᕐᕉᓐᓂᒃ ᐅᖃᓕᒫᒐᕐᓂᑦ ᖃᐅᔨᒪᔭᐅᓕᓚᐅᖅᑐᑦ ᐃᓕᓐᓂᐊᖅᑎᓕᒫᓄᑦ ᐊᒻᒪ ᓄᐊᑦᑎᖃᑦᑕᖅᑐᓄᑦ ᐃᓄᐃᑦ ᓴᓇᐅᒐᖏᓐᓂ: ᐃᓄᓐᓄᑦ ᓴᓇᔭᐅᓯᒪᔪᑦ/Eskimo Sculpture/Sculptureesquimaude) (1965) ᐊᒻᒪ ᓴᓇᔭᐅᓯᒪᔪᑦ ᐃᓄᓐᓄᑦ/Sculpture of the Eskimo (1972).

1960-ᖏᓐᓂ ᑕᑯᔭᒐᖃᕐᕕᒃ ᐱᒻᒪᕆᐅᔪᒥᑦ ᑲᔪᖏᖅᓯᓚᐅᖅᑐᑦ ᓄᐊᑦᑎᓗᑎ ᐃᓄᐃᑦ ᓴᓇᐅᒐᖏᓐᓂ ᓂᐅᕕᕐᖓᑕ 139 ᐱᒻᒪᕆᐅᔪᓂ ᓴᓇᔭᐅᓯᒪᔪᑦ ᓱᕕᓐᑕᓐᒥᑦ. 1976-ᒥᑦ ᕕᓂᐲᒃ ᓴᓇᙳᐊᒐᐃᑦ ᑕᑯᒐᓐᓈᒐᖃᕐᕕᒻᒥ ᓂᐅᕕᕐᖓᑕ ᐱᖃᑖ ᓄᐊᑕᐅᓯᒪᔪᓂᑦ ᔪᐊᔾ ᓱᕕᓐᑕᓐᒥᑦ ᐅᖓᑖᓃᑦᑐᑦ 900 ᓴᓇᔭᐅᓯᒪᔪᑦ, ᐊᒥᐊᖅᑕᐅᓯᒪᔪᑦ, ᐊᒻᒪ ᑎᑎᖅᑐᒐᐃᑦ. ᑕᑯᔅᓴᐅᑎᑕᐅᑎᓂᖏᑦ ᓱᕕᓐᑕᓐ ᓄᐊᓯᒪᔭᖏᑦ ᐊᒥᓱᒐᒪᓐᓄᑦ ᐊᕐᕌᒍᓅᓚᐅᖅᑐᖅ, 1987-ᒥ, ᐱᖃᓯᐅᑎᓯᒪᓪᓗᑎ ᐅᑯᓂᖓ ᑎᑎᕋᖅᑕᐅᓯᒪᔪᑦ. 1989-ᒥ, ᓄᐊᑕᐅᓯᒪᒃᑲᓂᖅᑐᑦ 85 ᓴᓇᐅᒐᐃᑦ ᑐᓂᔭᐅᑐᐃᓐᓇᓚᐅᖅᑐᑦ ᑕᑯᔭᒐᖃᕐᕕᒻᒧᑦ.