Pudlat, Aoudla
Kinngait (Cape Dorset)
(1951–2006)
Pudlat, Aoudla
(1951–2006)
ᐊᐅᓪᓚ ᐳᓪᓚᑦ ᑭᓱᖑᐊᓕᐅᖅᑎ ᐊᒻᒪᓗ ᐱᐅᓴᖅᓯᒪᔪᓂ ᓴᓇᓲᖅ ᑭᓐᖓᕐᒥᐅᑕᖅ, ᓄᓇᕗᑦ. ᐳᓪᓚᑦ ᐊᔪᕈᓐᓃᖅᓴᖃᑦᑕᓚᐅᖅᑐᖅ ᐊᒥᓱᓂᒃ ᖃᓄᐃᓕᖓᔪᓐᓇᖅᑕᒥᓂᒃ ᐊᒻᒪᓗ ᓴᓇᔪᓐᓇᖅᑕᒥᓂᒃ, ᑕᐃᒪᓗ ᐊᔪᖏᑦᑎᐊᓕᓚᐅᖅᑐᖅ ᑎᑎᖅᑐᒐᖅᑕᐅᓯᒪᔪᓂᒃ ᐊᒻᒪᓗ ᑎᑎᕋᐅᔭᖃᑦᑕᖅᖢᓂ. ᐅᓇ ᓴᓇᖑᐊᑦᑕᓕᓚᐅᖅᓯᒪᔪᖅ ᕿᑎᐊᓂ 1960-ᓂ ᓴᓇᖑᐊᖃᑦᑕᖅᖢᒋᑦ ᐃᓚᒌᖑᐊᑦ, ᐅᑭᐅᖅᑕᖅᑐᖅ ᓂᕐᔪᑎᖏᑦ ᐊᒻᒪᓗ ᓄᓕᐊᔪᒃ. ᑕᐃᑲᓂ 1970-ᓂ ᐳᓪᓚᑦ ᑎᑎᕋᐅᔭᖃᑦᑕᓕᓚᐅᖅᑐᖅ ᐊᒻᒪᓗ ᐃᓕᓐᓂᐊᖅᑎᑕᐅᓪᓗᓂ ᑭᓐᖓᐃᑦ ᑎᑎᖅᑐᒐᕐᕕᖓᓂ. ᓯᕗᓪᓕᖅᐹᖅ ᓴᕿᑕᐅᔪᖅ ᑭᓐᖓᐃᑦ ᐊᕐᕌᒍᑕᒫᑦ ᑎᑎᖅᑐᒐᖅᓯᒪᔪᑦ ᓄᐊᑕᐅᓯᒪᔪᓂ ᑕᐃᑲᓂ 1980 ᐊᒻᒪᓗ ᑲᔪᓯᓚᐅᖅᑐᑦ ᓴᕿᑕᐅᖃᑦᑕᖅᖢᑎᒃ ᓄᐊᑕᐅᓂᐊᖅᑐᓂ, ᑖᒃᑯᐊᓗ ᑎᑎᖅᑐᒐᑦᕝᖅᑕᖏᑦ ᓴᕿᑎᑕᖏᑦ ᐊᓯᒥ ᓴᓇᖑᐊᖅᑎᑦ ᓴᓇᔭᖏᑦ. ᐋᕿᑦᑎᐊᖅᐸᓪᓕᐊᓗᒋᑦ ᓴᓇᖑᐊᕈᓐᓇᐅᓯᓂ, ᐳᓪᓚᑦ ᑕᒪᐃᓐᓂᒃ ᑎᑎᖅᑐᒐᐅᓯᖅ ᐊᒻᒪᓗ ᑎᑎᖅᑐᒐᖅᑕᐅᓪᓗᑎᒃ ᑎᑎᕋᐅᔭᖅᑕᖏᑦ ᓇᖕᒥᓂᖅ ᑎᑭᓵᒃᓴᐅᓂᐊᕐᒪᑕ ᑎᑭᐅᑎᓚᐅᓐᖏᓂᖓᓂ 1990. ᐳᓪᓚᑦ ᑎᑎᕋᐅᔭᕈᓯᖓ ᐊᔾᔨᒌᓐᖏᑦᑐᑦ ᐊᔾᔨᓕᐅᒐᐅᖂᔨᔪᑦ ᐊᒻᒪᓗ ᓯᖕᓇᑑᒪᓂᑦ ᓴᕿᓯᒪᔪᑦ. ᐅᓇ ᑎᑎᖅᑐᒐᖅᓯᒪᔭᖓ Woman at Inukshuk Point (ᐊᕐᓇᖑᐊᖅ ᐃᓄᒃᑐᒃ ᓄᕗᐊᓂ) (ᐃᒻᒪᖄ 1983-ᒥᑦ 1986-ᒧᑦ), ᓴᓇᒃᑲᓐᓂᖅᓯᒪᔭᖓ ᐊᔾᔨᓕᐊᖏᓐᓂᑦ ᔨᒥ ᒫᓂᖕ, ᐅᓇᓗ ᐆᒃᑑᑎᐅᕗᖅ ᐊᔪᖏᑦᑎᐊᕐᓂᐊᓂᒃ ᐃᓅᓯᕐᒥ ᑕᐃᒪᐃᓕᖓᓪᓚᑖᖅᑐᕕᓂᕐᓂᒃ ᓴᕿᑎᑦᑎᓲᖅ. ᐳᓪᓚᑦ ᐱᑦᑎᐊᓕᖃᑦᑕᓚᐅᖅᑕᖏᑦ ᓇᓗᓇᐃᔭᑦᑎᐊᖅᖢᒋᑦ ᐋᕿᒃᓯᒪᓇᔭᕐᓕᖓ ᓄᑕᕋᓛᖑᐊᖅ ᐊᕐᓇᐅᑉ ᐊᒪᐅᑖᓃᑦᑐᖅ ᑕᕗᖓᓗ ᑐᒃᑐᑦ ᓂᕿᖏᑦ ᐅᔭᖃᓂ ᐃᓄᒃᓱᖕᒥ. ᑎᑎᖅᑐᒐᖅᑕᖏᑦ ᓂᐅᕕᖅᑕᐅᓯᒪᔪᑦ ᓚ ᒍᐃᑦ (ᐊᑎᖃᓚᐅᖅᓯᒪᔪᖅ ᑲᓇᑕᒥ ᒍᐃᑦ ᒥᖅᓱᒐᕐᓂᒃ) ᒪᓐᑐᕆᐊᒥ, ᑯᐸᐃᒃ, ᑕᐃᑲᓂ 1986 ᐃᖃᐅᒪᔾᔪᑕᐅᑎᓪᓗᒍ ᐊᐅᓚᑦᓯᔨᑦ 90-ᓂᒃ ᐅᑭᐅᖃᓕᖅᑎᓪᓗᒋᑦ. ᐳᓪᓚᑦ ᐱᓐᖑᐊᕆᔭᖃᖃᑦᑕᓚᐅᖅᑐᖅ ᐊᕙᓗᓕᖅᐸᒃᖢᒋᑦ ᐊᒻᒪᓗ ᐱᖓᓲᓕᖓᔪᑦ ᑕᑯᒃᓴᐅᓂᖏᑦ ᐊᒥᓱᓂ ᓴᓇᔭᖏᓐᓂ ᐋᑭᒃᓯᒪᓪᓗᒋᑦ. ᑖᓐᓇ Shamminizing (ᐊᖓᑰᓂᖅ) (2000) ᑎᑎᖅᑐᒐᖅᓯᒪᔭᖓ ᐱᓯᒪᔪᖅ ᕿᓂᖅᑐᓂᒃ ᓴᓇᓯᒪᓪᓗᓂ ᑕᑕᑎᖅᓯᒪᓪᓗᒍ ᑖᓐᓇ ᐸᐃᐹᖅ ᑕᒪᕐᒥᒃ, ᖃᓕᕇᓕᖅᓯᒪᓪᓗᒋᑦ ᐊᒥᓱᑦ ᑕᐅᑦᑐᓂ ᐊᒻᒪᓗ ᑭᓱᖑᐊᑦ ᐃᓂᖃᖅᖢᑎᒃ. ᐅᖃᖃᑎᒌᒍᑎᒋᓪᓗᒋᑦ, ᓄᓇᒥᐅᑕᕐᓂᒃ ᑎᖕᒥᐊᖑᐊᓂᐊᖏᑦ ᓴᖏᓂᖃᖅᐳᑦ ᐴᖅᓯᒪᓪᓗᑎᒃ, ᓴᕿᑎᑕᖏᑦ ᓯᓚᑖᓄᑦ ᐊᓕᓚᔪᖅ ᑎᑎᑦᑎᐊᖅᓯᒪᓪᓗᒋᑦ ᑖᓐᓇᓗ ᑕᑯᔭᐅᓂᐊᕐᒪᑦ ᐅᐸᒃᑕᐅᓗᓂ. ᐳᓪᓚᑦ ᑕᐃᒪᐃᑦᑐᓪᓚᕆᐅᔮᓕᖅᑎᑕᖏᑦ ᑎᖕᒥᐊᖑᐊᑦ ᓴᖀᓇᖃᑦᑕᓚᐅᖅᑐᖅ ᑭᓐᖓᐃᑦ ᐊᕐᕌᒍᒥ ᑎᑎᖅᑐᒐᖅᓯᒪᔪᓂᒃ ᓄᐊᓯᒪᔭᖏᓐᓂ. ᐅᓇ ᑕᖅᓯᖅᓱᖅᓯᒪᑦᑎᐊᖅᑐᖅ ᑎᑎᖅᑐᒐᖅᑕᖓ Bird of Baffin (ᕿᑭᖅᑖᓗᑉ ᑎᖕᒥᐊᖓ) (1981) ᑕᒪᕐᒥᒃ ᓴᕿᑎᑦᑎᐊᖅᖢᒍ ᐊᒻᒪᓗ ᖃᓄᐃᓕᐅᕆᐊᖃᖅᑐᑦ ᐱᔭᕇᖅᓯᒪᑦᑎᐊᖅᖢᒋᑦ. ᐋᕿᑦᑎᐊᖅᓯᒪᔪᒻᒪᕆᐋᓗᐃᑦ ᓴᖑᖓᐅᖅᑐᑦ ᐆᔭᐅᔭᖅ ᐊᒻᒪᓗ ᖁᖅᓱᖅᑐᑦ ᓴᕿᔮᖅᖢᑎᒃ ᑎᖕᒥᐊᖅ ᖃᖓᑕᒐᒥ ᓱᓗᖏᑦ, ᐊᕙᓗᖃᖅᖢᓂ ᐊᐅᐸᖅᑐᒥᒃ ᐊᒻᒪᓗ ᑐᖑᔪᖅᑐᓂᒃ. ᑕᖅᓴᖏᑦ ᐊᔾᔨᒋᓐᖏᓪᖢᒋᑦ ᐸᐱᕈᐊᓂ, ᐋᕿᑦᑎᐊᖅᓯᒪᓕᕈᑎᒋᓪᓗᒍ ᖃᖑᔪᖕᓂᖅᓴᐅᓪᓗᒋᑦ ᓴᖑᓪᓗᓂ ᐃᓗᐊᓂ ᓴᓇᔭᖏᑦ. ᐊᖕᒪᓗᖅᑑᑎᑦ ᑕᐃᒪᓐᓇᑦᑕᐃᓐᓇᐅᖏᓐᓇᖅᖢᑎᒃ ᑎᖕᒥᐊᖑᐊᑦ ᓱᓗᖑᐊᖏᑦ ᑕᑯᒥᓇᖅᓯᑎᓯᒪᑦᑎᐊᖅᑐᑦ, ᓴᓇᑦᑎᐊᖅᓯᒪᔪᑦ ᑐᑭᓕᐅᕈᑎᒋᓯᒪᓪᓗᒋᑦ ᑕᖅᓴᖏᑦ ᑎᑎᕋᐅᑎᒧᑦ ᑎᑎᖅᑐᒐᖅᓯᒪᔪᑦ ᑎᑎᖅᑐᒐᖅᑎᑦᑎᓲᖅ ᐱᑦᓯᐅᓛᒃ ᓂᕕᐊᖅᓯ. ᐳᓪᓚᑦ ᓴᓇᔭᖏᑦ ᓯᕗᓪᓕᑦ ᓴᕿᑕᐅᓯᒪᔪᑦ ᐊᑕᐅᓯᐅᓪᓗᓂ ᑕᑯᔭᒐᖃᕐᕕᖕᓂ Aoudla Pudlat: Drawings (ᐊᐅᓪᓚ ᐳᓪᓚᑦ: ᑎᑎᕋᐅᔭᖅᑕᖏᑦ) (1980-1981) ᐋᕿᒃᓯᒪᔭᖏᑦ ᑎᐅ ᒍᐊᑎᖕᑕᓐ ᑎᒥᖓ ᑕᐃᑲᓂ ᓅ ᔮᒃ, ᓅ ᔮᒃ. ᐳᓪᓚᑦ ᓴᓇᔭᖏᑦ ᑲᔪᓯᔪᑦ ᓴᕿᑕᐅᖃᑦᑕᖅᖢᑎᒃ ᑕᑯᔭᒐᖃᕐᕕᖕᓂᑦ ᑕᐃᒪᖓᓂᑦ 1980-ᓂᑦ ᐊᒻᒪᓗ 1990-ᓂᑦ ᑲᓇᑕᒥ, ᔪᓇᐃᑎᑦ ᓯᑕᐃᑦᔅ ᐊᒻᒪᓗ ᔫᓚᑉ. ᑕᐃᑲᓂ 1996, ᐳᓪᓚᑦ ᓅᓚᐅᖅᑐᖅ ᖃᒪᓂᑦᑐᐊᕐᒧᑦ, ᓄᓇᕗᑦ, ᐃᓕᓐᓂᐊᕆᐊᖅᖢᓂ ᑎᑎᖅᓱᒐᕐᓂᕐᒥᒃ ᓄᑕᐃᑲᓂ ᓄᓇᕗᒻᒥ ᓯᓚᑦᑐᖅᓴᕐᕕᒃ. ᐃᑲᔫᑎᓚᐅᖅᑐᖅ ᐊᒥᓱᓂᒃ ᓄᑖᓂᒃ ᐱᓕᕆᔾᔪᑕᐅᓕᖅᑐᑎᒍᑦ ᓴᓇᓪᓗᓂ ᖃᒪᓂᑦᑐᐊᕐᒥ ᑎᑎᖅᑐᒐᖅᑕᐅᓯᒪᔪᑦ ᓄᐊᑕᐅᓯᒪᔪᓂ, ᐃᓚᒋᔭᐅᓪᓗᓂ ᕿᔪᒃ ᐊᒻᒪᓗ ᑎᑎᖅᑐᒐᖅᓯᒪᔪᖅ Then and Now (ᑕᐃᔅᓱᒪᓂ ᐊᒻᒪᓗ ᒫᓐᓇ) (2001). ᐳᓪᓚᑦ ᑲᔪᓯᔪᖅ ᓴᓇᖕᖑᐊᖃᑦᑕᖅᖢᓂ ᐊᒻᒪᓗ ᑎᑎᖅᑐᒐᖃᑦᑕᖅᖢᓂ ᖃᒪᓂᑦᑐᐊᕐᒥ ᑭᓯᐊᓂ ᐃᓅᔪᓃᓚᐅᖅᓯᒪᕗᖅ 2006. ᓴᓇᔭᖏᑦ ᓇᓂᔭᐅᔪᓐᓇᖅᑐᑦ ᐱᖁᓯᒋᔭᐅᔪᑦ ᐊᒥᓱᓂᑦ ᓴᓇᖑᐊᖅᑐᓕᕆᓂᕐᒧᑦ ᑎᒥᖁᑎᒋᔭᐅᔪᓂ, ᐃᓚᒋᔭᐅᓪᓗᑎᒃ ᑲᓇᑕ ᑕᑯᔭᒐᖃᕐᕕᒃ ᐋᑐᕚ, ᐋᓐᑎᐅᕆᐅ, ᕕᓂᐲᒃ ᓴᓇᖑᐊᖅᓯᒪᔪᓂ ᑕᑯᔭᒐᖃᕐᕕᒃ ᒫᓂᑑᐸᒥ ᐊᒻᒪᓗ ᑲᓇᑕ ᑕᑯᔭᒐᖃᕐᕕᒃ ᐃᑦᑕᕐᓂᑕᓂᒃ ᑳᑦᑎᓄ, ᑯᐸᐃᒃ.
ᓴᓇᙳᐊᖅᑎᑦ ᑭᓇᐅᓂᖏᓐᓄᑦ ᑎᑎᕋᖅᓯᒪᔪᑦ ᑐᓂᔭᐅᓯᒪᔪᑦ ᐊᖏᖅᑕᐅᓯᒪᓪᓗᑎᒃ ᐃᓄᐃᑦ ᓴᓇᙳᐊᖅᑎᓕᕆᔨᒃᑯᑦ ᑐᙵᕝᕕᒃ. ᑕᒪᕐᒥᒃ ᐱᔪᓐᓇᐅᑎᑦ ᒪᓕᒐᖅᑎᒍᑦ.