ᐱᒋᐊᓕᕋᑖᕐᓂᖏᓐᓂ 1960-ᑦ, ᓴᓇᙳᐊᒐᐃᑦ ᐆᒪᔪᖑᐊᑦ ᐊᓂᕐᓂᖏᑦ ᐊᒻᒪᓗ ᐆᒪᔪᕈᖑᐊᖅᑐᑦ ᖃᐅᔨᒪᔭᐅᒪᕆᓕᓚᐅᕐᒪᑕ ᑭᙵᕐᓂ (ᑲᐃᑉ ᑐᐊᓴᑦ), ᑭᓯᐊᓂ ᐱᐅᒋᔭᐅᔪᓐᓃᓚᐅᕐᒪᑕ ᑎᑭᑕᐅᑎᓪᓗᒋᑦ 1970-ᑦ. ᑕᐃᒪᖓᓂᑦ ᑭᖑᕙᖅᑎᓪᓗᒋᑦ 1980-ᑦ, ᑕᐅᑦᑐᖃᑎᓕᐅᖅᑏᑦ ᑕᓱᐃᕙᓪᓕᐋᓯᒪᓕᕐᒪᑕ ᐱᔭᐅᒍᒪᓗᐋᓂᖏᓐᓂᒃ ᐊᓯᕈᒃᐸᓪᓕᐊᙳᐋᖅᑐᐃᑦ ᑕᐅᑦᑐᖃᕐᓂᖏᑦ, ᐱᓗᐊᙳᐊᖅᑐᒥᒃ ᐊᖓᒃᑯᐃᑦ ᐊᓯᕈᒃᐸᓪᓕᐊᙳᐋᖅᑎᓪᓗᒋᑦ, ᐊᒡᓛᓪᓗᓐᓂᑦ ᖃᐅᔨᒪᓂᖏᑦ ᖃᓄᐃᓕᖓᓂᕆᓲᖏᓐᓂᒃ ᐅᓂᒃᑳᖑᔪᑦ ᐊᒻᒪᓗ ᐅᒃᐱᕆᔭᐅᔪᑦ ᐃᓚᖓᒍᑦ ᑐᑭᔭᐅᓗᐋᖏᒃᑲᓗᐋᖅᑎᓪᓗᒋᑦ. ᑭᓕᐸᓕᒃ ᕿᒥᕐᐱᒃ ᐅᖃᓕᓚᐅᕐᒪᑦ ᖃᐅᔨᒪᓗᐋᖏᒃᑲᓗᐋᖅᑎᓪᓗᒍᒎᖅ ᖃᐅᔨᒪᓂᕆᒍᒪᔭᕋᓗᐊᖓᓂᒃ ᐱᖅᑯᓯᒃᑯᑦ ᐅᓂᒃᑳᖅᑐᐊᓂᒃ, ᖁᕕᐊᒋᔭᖃᓪᓚᕆᓐᓂᕋᓪᓗᓂ ᓴᓇᒋᐊᒃᓴᖅ ᐆᒪᔪᑦ-ᐃᓄᕈᙳᖔᖅᑐᓂᒃ. ᐃᒫᖑᙱᖔᕐᓗᓂ ᓴᕿᑎᑦᑎᓗᓂ ᐊᖓᒃᑯᕐᒥᒃ ᐃᓅᓗᓂ ᐆᒪᔫᖁᔨᓕᕐᓗᓂ, ᑭᓕᐸᓕᒃ ᐃᒫᖑᒐᔪᒻᒪᑦ ᓴᓇᓯᒪᓂᓕᐅᕐᓗᓂ ᐊᖏᔫᒥᒃ, ᐃᒃᐱᓐᓇᖅᓯᑎᑦᑎᓗᓂ ᐃᓅᑉ ᑮᓇᖓ ᐊᓂᕙᓪᓕᐋᙳᐋᕐᓗᓂ ᖃᑎᒐᖓᓂᑦ ᐆᒪᔫᑉ.

2006-ᒥ, ᐊᖏᔪᑦ ᓄᐊᑕᐅᓯᒪᔪᑦ 246 ᓴᓇᔭᐅᓯᒪᔪᑦ ᑐᓂᔭᐅᑐᐃᓐᓇᓚᐅᖅᑐᑦ ᑕᑯᔭᒐᖃᕐᕕᒻᒧᑦ ᕚᓐᑰᕗᒥ ᓄᐊᑦᑎᖃᑦᑕᖅᑐᒧᑦ ᓘᑦᑖᖅ ᕼᐃᐅᕆ ᕗᐃᓐᕌᑉ. ᕗᐃᓂᐸᐃᒡᒥᐅᑕᓪᓚᕆᒃ, ᕗᐃᓐᕌᑉ ᓂᐅᕕᖃᑦᑕᕐᓂᑰᒻᒪᑦ ᐃᓄᐃᑦ ᓴᓇᖑᐊᒐᖏᓐᓂᑦ ᐱᒋᐊᖅᑐᓂ 1968. ᐱᔪᒪᓂᖃᒻᒪᕆᓕᓚᐅᖅᑐᖅ ᓄᐊᑦᑎᓂᕐᒥᑦ ᐃᓄᐃᑦ ᓴᓇᐅᒐᖏᓐᓂᑦ 1971-ᒥᑦ, ᐊᒻᒪ ᐱᓕᕆᓪᓗᐊᑕᖃᓕᖅᑐᓂ ᓂᐅᕕᖃᑦᑕᓂᕐᒥᑦ ᓴᓇᔭᐅᓯᒪᔪᓂᑦ ᐆᒪᔪᒥᓂᕐᒦᖔᖅᑐᓂᑦ ᐊᖑᓇᓱᑦᑕᐅᕙᑦᑐᓂᑦ (ᕿᓚᓗᒐᐃᑦ ᓴᐅᓂᖏᑦ, ᐊᐃᕖᑦ ᑑᒑᖏᑦ, ᐊᒻᒪ ᑐᑦᑐᐃᑦ ᓇᔾᔪᖏᑦ). 54 ᓴᓇᔭᐅᓯᒪᔪᑦ ᕗᐃᓐᕌᑉ ᓄᐊᓯᒪᔭᖏᑦ ᓴᓇᔭᐅᓯᒪᔪᑦ ᐆᒪᔪᒥᓂᕐᒦᖔᖅᑐᑦ, ᐊᒻᒪ 36 ᑖᒃᑯᐊᓂᖓ ᕿᓚᓗᒐᐃᑦ ᓴᐅᓂᖏᑦᓐᓂ. ᕗᐃᓐᕌᑉ ᐋᓐᓂᐊᓯᐅᖅᑎᐅᓚᐅᖅᓯᒪᔪᖅ ᐱᔾᔪᑎᒋᔭᖓ ᐱᔪᒪᓂᖃᕐᓂᖓ ᑖᒃᑯᓂᖓ ᐆᒪᔪᒥᓂᕐᒦᖔᖅᑐᓂᑦ. ᑭᓯᐊᓂᓕ, ᐱᔪᒪᓂᕆᓂᖅᓴᖓ ᐱᐅᔫᑎᓅᓚᐅᖅᑐᖅ. ᐱᔪᒪᓂᖃᓗᐊᓚᐅᖅᑐᖅ ᓴᓇᖑᐊᒐᑦᑎᐊᕙᓐᓂᑦ ᓴᓇᔭᐅᓯᒪᔪᑦ ᓇᑦᑎᓕᖕᒥᐅᑦ (ᓇᑦᓯᓕᒃ) ᓴᓇᖑᐊᖅᑏᑦ ᐅᕙᓐᖓᑦ ᑕᓗᕐᔪᐊᖅ, ᐅᖅᓱᖅᑑᖅ, ᐊᒻᒪ ᑰᒑᕐᔪᒃ. ᓴᓇᔭᐅᓯᒪᔪᑦ ᐊᖓᒃᑯᖃᓂᕐᒥᑦ ᐃᓗᓕᓕᓐᓂᑦ ᐱᔪᒪᓂᖁᓗᐊᓪᖑᐊᓚᐅᖅᑐᖅ, ᐱᓗᐊᖅᑐᒥᑦ ᐆᒪᔪᐃᑦ/ᐃᓄᐃᑦ ᐊᓯᔾᔨᖅᑐᓂᑦ. ᓇᓗᓇᐃᖅᓯᓚᐅᖅᑐᖅ ᐅᓴᐅᓚᐅᖏᑦᑐᖅ “ᐱᑕᖃᒐᔪᑦᑐᑦ” ᑭᓯᐊᓂ ᐊᔾᔨᐅᖏᑦᑐᑦ, ᐊᒻᒪᓘᓐᓃᑦ ᖃᓄᐃᓕᖓᕈᓘᔭᖅᑐᒥᑦ ᓴᖏᔪᒥᑦ ᐱᔪᒪᓂᕆᔭᖓᓄᑦ. ᒫᑦᓯᒥ 2008, ᕼᐃᐅᕆ ᕗᐃᓐᕌᑉ ᓄᐊᓯᒪᔭᖏᑦ ᐅᖃᐅᓯᐅᓚᐅᖅᑐᑦ ᕕᓂᐲᒃ ᓴᓇᙳᐊᒐᐃᑦ ᑕᑯᒐᓐᓈᒐᖃᕐᕕᒻᒥ ᑕᑯᔅᓴᐅᑎᑕᐅᔪᓂᑦ ᐊᒻᒪ ᑎᑎᕋᖅᑕᐅᓯᒪᔪᓂᑦ.